سہ فریقی دفاعی معاہدہ کس انا برخلاف اف، ڈیہہ انا امن، شونہالی و سلامتی کن ءِ،وزیر اعظم شہباز شریف

اسلام آباد، وزیراعظم شہباز شریف پارینے کہ پاکستان، سعودی عرب و ترکیہ نا نیام اٹی پک مروک دفاعی معاہدہ پین ہچ ءُ ملک اسے نا برخلاف بیدادی کن اف بلکن نِلا ڈیہہ نا امن، شونہالی و سلامتی کن ءِ۔ معاہدہ غا فیلڈ مارشل و نائب وزیراعظم ءِ مبارکبادی کڑزرہ۔ فتنہ الخوارج نا برخلاف برجا جنگ اٹی شہید آتا قربانیک بھرم اتیرہ و ملک دہشت گردی آن پاک مرسا امن و شون نا کسر آ مونی کاہک۔ آزاد کشمیر نا ویل آتا ایسری ءِ امن نا کمک اٹ کشنگ نا مخ تفی ءِ کینہ۔ کابینہ دیوان اٹی گپ و تران کرسا وزیراعظم بشخ ہلوک آتے بخیر کرے و پارے کہ دامنہ دے اٹی اہم ءُ واقعہ مسنو۔جمہ نا دے مکہ مکرمہ ٹی پاکستان، سعودی عرب و ترکیہ نا نیام اٹی سَے فریقی دفاعی معاہدہ غا دستخط کننگا۔ داڑان مست تدوک آ سال پاکستان و سعودی عرب نا نیام اٹی دفاعی معاہدہ پک مسوسس۔ پاکستان و ترکیہ نا دہائی تیا تالان کمکاری نا تعلقداریک ءُ۔ پاکستان نا الس و فوج ءِ اللہ تعالیٰ حرمین الشریفین نا رکھ انا اہم انگا زمواری نا زمواری ءِ تسنے۔ ہرادے تدوک آ سال باقاعدہ وڑاٹ آفیشل کننگا۔ دا سَے دفاعی معاہدہ پاکستان و سعودی عرب نا دفاعی معاہدہ نا ودکی ءِ او پارے کہ دا معاہدہ پین ملک اسے نا برخلاف بیدادی کن اف بلکن ڈیہہ اٹی امن، سلامتی و شونہالی کن ءِ۔ مچ آ امتِ مسلمہ کن دا معاہدہ اسہ درور اسے۔ نائب وزیراعظم اسحاق ڈار و فیلڈ مارشل ءِ معاہدہ غا مبارکبادی ایتوہ۔ دا اینو نا ہیت اف بلکن کیہی سال آتیان دا معاہدہ کن کوشست آک برجا ئسر، ہراکہ داسہ پورو مسر۔ وزیراعظم ہنگو و سوات اٹی دہشت گردی نا واقعہ غاتے بدبختی گوندسا پارے کہ دا واقعہ غاتیٹی میجر احسان الٰہی، کیپٹن حمزہ، ڈی ایس پی دیہات خان تون اوار ورناک تینا جان تے ندر کریر و ملک انا لکھ آ چناتے بچفسا تینا چناتے چوری کریر۔ دا ورناک بہادری و جیرت اٹ دہشت گرد آتتون مون تسر۔ او تدوک آ دے تے ٹی زوال کروک ن لیگ نا راہشون اقبال چنہڑ نا خذمت آتا ستاءِ کرسا پارے کہ او سخت انگا وخت اٹی اسہ تلار اسے آنبار تینا جماعت تون اوار سلیس۔ وزیراعظم شہید و اقبال چنہڑ کن فاتحہ خوانی ہم کرفے۔ وزیراعظم پارے کہ فتنہ الخوارج ءِ چٹفنگ انگ ءِ‘ ننا شہید آتا قربانیک زیان مفسہ۔ ہمو دے مُر اف ہراتم ملک دہشت گردی آن پاک مرسا شون و آسودہی نا کسر آ مونی کاہک۔ وزیراعظم آزاد کشمیر گچین کاری تیا ہیت کرسا پارے کہ میرپور و مظفرآباد نا گچین کاری تیٹی ن لیگ ءِ سرسہبی دوئی مس۔ اینو باغ اٹی گچین کاری مننگ اٹی ءِ۔ کشمیر نا الس ن لیگ ءِ وونٹ تس۔ مہاجر آتا نشست آتے اوار کرسا ن لیگ ءِ گیشتری رسینگانے‘ الس نواز شریف آ پت انا وونٹ تسنے۔ انشاء اللہ ننا حکومت جوڑ مس تو کشمیر اٹی شون و شونہالی نا سفر بناکیک او پارے کہ اسہ مہذب ءُ راج اسے ٹی لاقانونیت نا موکل تننگپک۔ باندات آتے میز آ تولسا ایسر کننگے۔ ہرا بندغ آک زراک آ درملکی پاننگ آ حالیت آتے خراب کننگ نا کوشست کریر اوفتا بابت پیدوار شاہدی ساڑی ءِ‘ نن آل پارٹیز کانفرنس نا بست و بند ءِ کرین اسہ پارٹی اسے آن بیدس کل جماعت آک بشخ ہلکر۔ کانفرنس اٹی ہر پہلو آ گپ و تران آن پد مہاجر آتا سیٹ آتا باندات آ دا امنائی مس کہ گچین کاری تیان پد دا باندات ءِ اسمبلی فورم آ اتسا ایسر کننگک۔ ولے داکان پد ہم منہ بندغ نا منپننگ ناسوب آن باندات آک بدبختی اٹ خراب مسر۔