حکومت صوبہ نا شونداری و الس نا شونہالی کن گام گیج آتے برجا تخک،وزیر اعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی تون دوشنبے نا دے صوبائی وزیر، صوبائی اسمبلی نا باسک، سیاسی جماعت آتا راہشون و ایلو اہم شخصیت آک جتا جتا اوڑدہی کریر۔ اوڑدہی کروک آتیٹی صوبائی وزیر میر ضیاء لانگو، میر عاصم کرد گیلو و نوابزادہ میر طارق مگسی، قائد حزبِ اختلاف میر یونس عزیز زہری، صوبائی اسمبلی نا باسک میر زابد ریکی، رحمت صالح بلوچ و ڈاکٹر محمد نواز کبزئی، پارلیمانی سیکرٹری میر عبدالصمد گورگیج و اصغر ترین، پاکستان پیپلز پارٹی بلوچستان نا صوبائی صدر سردار عمر گورگیج، جمعیت علماء اسلام بلوچستان نا صوبائی امیر مولانا عبدالواسع، جرمنی نا اعزازی قونصل میر مراد بلوچ، مسکوہی ضلع ناظم سیوی میر حیر بیار خان ڈومکی اوار ئسر۔اوڑدہی تا وخت آ صوبہ نا جم سیاسی و انتظامی حالیت، السی ویل، شونداری باندات و چندی اہم انگا باندات آتیا گپ وتران کننگا۔ داوخت آ صوبہ ٹی برجا شونداری ڈٹ، السی شونہالی نا گام گیج و امن وایمنی تون اوار تین پہ تینی استخواہی تا باندات آتیا گپ ہم وتران کننگا۔ وزیراعلیٰ میر سرفراز بگٹی پارے کہ بلوچستان نا شون، السی ویل آتا ایسری و صوبہ ٹی مدامگی امن نا برجائی حکومت نا اولیت آتیٹی اوار ءِ۔ او پارے کہ حکومت کل سیاسی و جمہوری واکدار آتا اواری اٹ صوبہ نا شون و الس نا شونہالی کن بھرمی گام گیج آتے برجا تخک۔ اوڑدہی تیٹی صوبہ نا جوانی، السی ویل آتا ایسری و شونداری عمل ءِ پین بھرمی جوڑ کننگ کن تین پہ تینی کمکاری و رابطہ کاری ءِ شون تننگ آ ہم امنا کننگا۔