حکومت زرکار آتے کن گچین چاگڑد نا فراوانی آ چکار کننگ ءِ،میر شعیب نوشیروانی

کوئٹہ، صوبائی وزیر خزانہ، مائنز و منرل ڈویلپمنٹ میر شعیب نوشیروانی بلوچستان زرکاری بورڈ انا دفتر نا دورہ ءِ کرے و وائس چیئرمین بلال خان کاکڑ تون اوڑدہی کرے، دا وخت آ مسکوہی وزیراعلیٰ بلوچستان میر علاؤالدین مری ہم ساڑی ئس۔ اوڑدہی ٹی بلوچستان اٹی زرکاری نا شون تننگ، خاص وڑ اٹ مائنز و منرلز نا بشخ اٹی ساڑی ودی وارخواہی، زرکار آتے آسراتی تا فراوانی و مدامگی زرگزرانی شون اتون تعلقدار باندات آتیا جم گپ وتران‘ قدرتی وسیلہ، معدنی کوڑی و صوبہ ٹی زرکاری کن ساڑی وارخواہی تا جاچ ءِ ہلنگا۔صوبائی وزیر خزانہ میر شعیب نوشیروانی بلوچستان نا معدنی وسیلہ غاتے صوبہ نا زرگزرانی شون نا اہم ءُ تمبہ اس گوندسا پارے کہ حکومت مائنز و منرلز نا بشخ اٹی زرکاری نا شون تننگ، شفافیت، پوسکنوڑ ٹیکنالوجی نا کاریم اٹ اتنگ و زرکار آتیکن جوان چاگڑد اسے نا فراوانی آ چکار کننگ اٹی ءِ زرکاری نا شون تننگ کن بی بی او آئی ٹی (BBOIT) نا کڑد انا ستاءِ کرسا پارے کہ صوبہ نا قدرتی وسیلہ غاتے پوسکنوڑ و مدامگی وڑ و ڈول اٹ کاریم اٹ اتسا بلوچستان ءِ زرگزرانی وڑ اٹ شون تننگ و زرکاری نا اہم ءُ بنجا اس جوڑ کننگ مریک۔ وائس چیئرمین بلال خان کاکڑ پارے کہ مائنز و منرلز سیکٹر اٹی زرکاری نا شون تننگ کن شفاف، آسان و زرکار دوست وڑ و ڈول المی ءِ۔ بلوچستان قدرتی وسیلہ، خاص وڑ اٹ معدنیات نا بابت گمان آن زیات بود تخک۔ صوبہ ٹی جتا جتا وڑ انا نہادی و اہم معدنی کوڑیک ساڑی ءُ ہرافتے پوسکنوڑ ٹیکنالوجی و بھرمی پالیسی تا کمک اٹ زرگزرانی شون تننگ نا اسہ سوگو ءُ وسیلہ اسے ٹی بدل کننگ مریک۔ او پارے کہ وزیراعلیٰ بلوچستان میر سرفراز بگٹی نا وژن نا رِد اٹ بلوچستان زرکاری بورڈ صوبہ ٹی زرکاری کن جوان چاگڑد ودی کننگ کن فعال کڑد ادا کننگ اٹی ءِ۔ اوڑدہی ٹی دا ہیت آ ہم زور شاغنگا کہ معدنی وسیلہ غاتا شون تننگ تون اوار چاگڑد نا رکھ و ہندی الس نا فائدہ ءِ ہم مون آ تخنگے۔