وار وار نا بریفنگ بس، کارکڑد نشان تننگے‘عمران خان

اسلام آباد (آن لائن ) وزیراعظم عمران خان تینا کابینہ نا باسک آتون اوار اعلیٰ بیورو کریسی ءِ پارینے کہ وار وار نا بریفنگ بس، کارکڑد نشان تننگے۔ ہرا کارکڑد نشان ایتک او اونا ٹیم اٹ مریک ایہن نہ کُل ءِ اُرا غا ہنوئی مریک۔ حوال نا رداٹ وزیراعظم عمران خان تینا کارکڑد نا بنداو آ ہچ ءُ وڑ اسے نا سمجھوتہ کپننگ نا فیصلہ کرینے او واضح کرینے کہ کہ داسہ وزیرک، سلاہکار آک، کمکارآک بیورو کریسی نا وڑ تے چٹفسا بریفنگ نا جاگہ غا کارکڑد نشان تروئی مریک۔ ادارہ غاتا کماش و بیورو کریسی نا کارکڑد ءِ ہم ہننگک او ہرانا کارکڑد جوان مس او سلک وخت اسکہ ایلوفک اُرا غا کارہ۔ وخت اس کہ وزیراعظم دا ہم واضح کرینے کہ حکومتی فیصلہ غاتیا عملدرآمد کرفنگ اٹ بے سہب سلوک آ وزیرک، سلاہکارک، کمکار و بیورو کریٹ آتے حقیقت ءِ پاروئی تمک۔ اگہ اوفتے آ ڈیوالئی ثابت مس تو اوفک تینا سیٹ آ سلنگ کپسہ۔ داکان بیدس وزیراعظم عمران خان پارینے کہ کورونا وائرس نا توننگ کن پاکستان نا گام گیج آتے داسہ جہانی ادارہ غاک ہم مننگ اٹی ءُ، دا بابت اٹ ننا حکمت عملی سرسہب مسنے، ہراڑے کورونا نا کیس آک زیات مریرہ اوڑے سخت لاک ڈاﺅن کننگک، دا خیال آتا درشانی ءِ او سلاہکار برائے پارلیمانی امور ڈاکٹر بابر اعوان تون ہیت وگپ کرسا کرے ہراڑے تدوک آ دے وزیراعظم آفس اٹ اوڑتون اوڑدہی کرے۔ حوال نا رداٹ ڈاکٹر بابراعوان وزیراعظم ءِ قومی اسمبلی نا وخت آ دیوان و اہم انگا پارلیمانی امور و کانود سازی نا بابت معلومداری نا بارواٹ پہہ کرے۔ وزیراعظم اُلسی ویل آتا ایسری کن پارلیمنٹ نا جوان کڑد آ ترند مس او پارے کہ پارلیمنٹ ءِ اُلسی مفاد آتا کانود سازی ءِ پک کروئی تمک او دا بابت اٹ اپوزیشن ہم تینا کڑد ءِ ادا کے۔ اوڑدہی ٹی گچین کاری اصلاحات ، نیب آرڈیننس اٹ ترمیم و ایلو ویل آتیا ہم ہیت وگپ مس۔ بابر اعوان جہانی ادارہ آکسفیم نا کورونا وائرس نا بارواٹ پاکستان نا حکمت عملی نا بابت رپورٹ آ وزیراعظم ءِ مبارکبادی تس او پارے کہ اونا پالیسی سرسہب مسنے، ہندا سوب آن داسہ ملک اٹ کورونا وائرس نا کیس آتیٹی کمتی بننگ اٹی ءِ۔