سی پیک ناپوروی آن ڈیہہ انا تقدیر بدل مریک، گورنر بلوچستان

کوئٹہ (خ ن) گورنر بلوچستان امان اللہ خان یاسین زئی پارینے کہ چائنا پاکستان اقتصادی راہداری (سی پیک) اسہ میگا پراجیکٹ اسے و دانا پورو مننگ آن مچ آڈیہہ انا تقدیر بدل مریک او پارے کہ چین، پاکستان نا عظیم آ سنگت و ہمسائے ملک ءِ‘ چین پاکستان تون ہر سختی ٹی کمک کرینے‘ ہندا سوب آن نن چین و پاکستان نا سنگتی آ گمر کینہ۔ دا خیال آتادرشانی ءِ او جمعہ نا دے ایمرجنگ پالیسی میکنگ انسٹی ٹیوٹ (EPI) نا کنڈآن کورونا نا وخت آ سی پےک و چائنا گلوبل لیڈرشپ نا سرحال آ اڈ تروک سیمینار آن تران کرسا کرے ہراٹی پاکستان اٹ تعینات چینی سفیر مسٹر جاو جینگ (Mr. Jao Jing) وبلوچستان نا سیاسی جماعت آتا راہشونک بشخ ہلکر‘گورنر بلوچستان سیمینار آن تران کرسا پارے کہ کورونا وائرس نا سوب آن ودی مروک حالیت آتے ٹی دنیا نا غٹ ملک آتا زرگزران‘ جانجوڑی و روزگار نا وارخواہیک بھاز زہمی مسنو‘ دا جہانی دین اٹ چین نا اہم ءُ کڑدار اس مسنے و مالی کمک و دارو فراوان کننگ نابابت چین تینے گلوبل لیڈر پک کرینے‘گورنر امان اللہ یاسین زئی پارینے کہ پاکستان چین نا دا انسانیت دوست کڑدار ناستاءِ کیک‘ پاکستان نئے بیرہ کسوک آ کورونا وائرس نا برخلاف جنگ اٹ بلکہ ہڑتوم آ ملک آتا اسیجائی دشمن تا برخلاف ہم سلوک ءِ۔ گورنر امان اللہ یاسین زئی پارینے کہ پاکستان و چین مچ آ ڈیہہ انا شونداری ٹی اڑاند جوڑمروک و ڈیہہ انا الس ءِ شونداری و شونہالی نافائدہ غاتیان محروم کروک آتا برخلاف ءِ۔گورنر امان اللہ یاسین زئی چینی قوم و حکومت ءِ باور کرفے کہ پاکستان ہر مشکل حالیت و سخت انگا وخت اٹ تینا سنگت چین اتون سلوک مریک۔