فلسطینی تیا اسرائیل نا بمباری، 24 بندغ شہید

اسلام آباد :  عئید آن مست فلسطینی تیا اسرائیل قیامت اس ٹہیفے، غزہ غا نہار آتیانبار بمباری کرینے، 130 جلہو تیٹی کیہی ہنکینی ماڑیک شست کننگار۔ خلیس آن گڑینگوک آ مخلوق تینے بچفنگ کن دانگ اینگ جت پت اٹ اختہ مس۔ چناک خلیس آن چیہانٹ کریرہ۔ بمباری آن شہید مروک آتا کچ 24 مسنے، ہرافتیٹی کیہی چنا ہم اریر، وخت اس کہ 180 فلسطینی ٹھپی مسنو۔ جلہو تیٹی حماس نا 15 کمانڈر ہم خلنگانو۔ فلسطینی صدر محمود عباس غزہ غا اسرائیلی جلہو آتا مذمت ءِ کرینے، و عئید آ اڈ تننگوک دود آتے کپننگ نا پڑو کرینے۔ اونا پاننگ ئس کہ جہانی برادری فلسطینی تا برخلاف اسرائیلی ڈوہ تا توننگ کن دمدستی گام گیج کے۔ میڈیا حوال آتا ر داٹ تدوک آ دے غزہ غان اسرائیلی علاقہ ٹی راکٹ خسنگاسر، ہرافتیان پد مروک دھماکہ غاتا سوب آن سائرن خلنگ آن اسرائیلی پارلیمنٹ ءِ خورک کننگا۔ اسرائیلی کمامدار آتا دعویٰ ءِ کہ راکٹ جلہو آتیان ہچ ءُ جانی نسخان اس متنے۔ اسرائیلی وزیراعظم نیتن یاہو پارینے کہ حماس ریڈ لائن آن جپانے، و ساڑی جھیڑہ کیہی دے اسکان برجا سلنگ کیک۔ او ہکل ترسا پارینے کہ اسرائیل پبی واکداری اٹ ورندی ایتک، و جلہ وکروک آتے دانا بدل ءِ تروئی تمک۔ ایلو کنڈ آ غزہ نا حالیت آ اوآئی سی نا آخبتی مندوب آتا دیوان اینو مریک، ہراٹی فلسطینی تے زور اٹ کشنگ نا باندات سجفنگک۔