سی ٹی ایس پی شارٹ لسٹڈ آتا آرڈر آتے جاری کننگے

0

Get real time updates directly on you device, subscribe now.

کوئٹہ (اے پی پی) سی ٹی ایس پی نا رداٹ محکمہ تعلیم بلوچستان اٹی شارٹ لسٹ اومیتدار آک صوبائی حکومت و محکمہ تعلیم آن خواست کرینو کہ مچ آ صوبہ ٹی ٹیسٹ پاس کروک آ سی ٹی ایس پی نا شارٹ لسٹڈ اومیتدار آتا آرڈر آتے زوت آن زوت جاری کننگے۔ دا خیال آتا درشانی ءِ سی ٹی ایس پی ایکشن کمیٹی پشین نا عہدیدار منیر احمد، غلام اسحاق، جمال خان، کلیم اللہ، جمیل احمد، صدام خان و ایلوفک پشین پریس کلب اٹ پریس کانفرنس آن تران کرسا کریر۔ اوفک پاریر کہ محکمہ تعلیم بلوچستان نا آسامی تے کن سی ٹی ایس پی نا رد اٹ ہلوک آ ٹیسٹ انا اومیتدار آتا پک میرٹ لسٹ بننگ آن پد ہم حکومت نا تَل وَل عجب ءِ، ودا ہیت است ہسونی نا سوب ءِ کہ اسہ کنڈ آ حکومت خوانندہ غا ورناتے ملازمت فراوان کننگ نا دعویٰ کننگ ءِ تو ایلو کنڈ آ سی ٹی ایس پی نا رداٹ محکمہ تعلیم نا آسامی تے کن شارٹ لسٹڈ اومیتدار آتا آرڈر آتے جاری کننگ نا بابت تَل وَل کننگ انگ ءِ۔ ہرانا سوب آن ورنا چین خاص وڑ اٹ ٹیسٹ ءِ پاس کروک آ اومیتدار آک بھاز مونجا ءُ۔ اوفک پاریر کہ ساڑی حکومت صوبہ ٹی بند اسکول آتے فعال کننگ و ساڑی اسکول آتے ٹی استاد آتا کمتی ءِ مر کننگ کن سی ٹی ایس پی نا رداٹ ٹیسٹ اڈ تس۔ ہرافتا نتیجہ غاک ہم بسر ولے بھلو وخت اس گدرینگ انگ آن پد ہم استاد آتے آرڈرجاری کننگ نا باندات پد تموک ءِ۔ او گورنمنٹ آف پاکستان آن خواست کریر کہ شارٹ لسٹڈ استاد آتا آرڈرآتے زوت آن زوت جاری کننگے تانکہ اوفتے اوفتا روا حق ملنگ کے و ہرااسکول آک بند ءِ او ہم فعال مننگ کیر۔

Get real time updates directly on you device, subscribe now.

Leave A Reply

Your email address will not be published.