چین نا پارلیمان شی جن پنگ ءِ مسٹمیکو وار صدر گچین کرے

بیجنگ : چین نا پارلیمان شی جن پنگ ءِ مسٹ میکو وار صدر گچین کرینے۔ سعودی میڈیا نا رداٹ شی جن پنگ جمعہ نادے آ مسٹمیکو وار 5 سال انا مد اکن چین نا صدر گچین مسنے۔ پارلیمان اٹی نیشنل پیپلز کانگریس نا 3 ہزار نا خڑک باسک آک دی گریٹ ہال اٹی شی جن پنگ ءِ صدر گچین کننگ کن امنائی وڑاٹ وونٹ تسر، اونا مدمقابل پین ہچ ءُ اومیتدار اس الوکہ۔ وونٹنگ کم و ود اسہ گھنٹہ اسکان برجاسلیس و الیکٹرانک گنتی کم و ود 15 منٹ اٹی پورو مس۔ شی جن پنگ ملک انا مرکزی فوجی کمیشن نا چیئرمین نا وڑاٹ ہم مسٹ میکو مد اکن گچین مس۔ پارلیمان ژاؤ لیجی ءِ چیئرمین و ہان ژنگ ءِ پوسکن آ نائب صدر گچین کرے۔ یات سلے کہ دا ہڑتوم آ بندغ آک صدر شی جن پنگ نا مسکوہی ٹیم آن ءُ۔ وزیراعظم محمد شہباز شریف شی جن پنگ ءِ مسٹ میکو وار چین نا صدر گچین مننگ آ مبارکبادی ترسا پارینے کہ چین نا الس و پارلیمان نا اوڑا پت اونا بھلا قائدانہ لائخی تا امنائی ءِ، صدر شی جن پنگ چین نا شونداری و شونہالی نا علامت جوڑ مسنے۔ جمعہ نادے آ وزیراعظم آفس نا میڈیا ونگ آن جاری بیان نا رداٹ شی جن پنگ نا مسٹ میکو وار چین نا صدر گچین مننگ آ تینا تہنیتی کلہو اٹی وزیراعظم پارے کہ اودے بروک آ پنچ سال اکن چین نا صدر گچین مننگ آ پاکستان نا حکومت و الس نا کنڈآن مبارکباد پیش کینہ۔ صدر شی جن پنگ آ چین نا الس و پارلیمنٹ نا پت اونا بھلا قائدانہ لائخی تا امنائی ءِ۔ صدر شی جن پنگ چین نا شونداری و الس نا شونہالی نا علامت جوڑ مسنے۔ وزیراعظم پارے کہ اونا کماشی ٹی چین دنیا نا سرفہرست زرگزرانی قوت جوڑ مسنے و دا سفر پدریسہ برجاءِ۔ صدر شی جن پنگ نا بصیرت افروز کماشی ٹی چین تعلیم، جان جوڑی، کشت وکشار، ایجادات، ٹیکنالوجی تون اوار ہر بشخ اٹی حیرت انگیز نا سرسہبی دوئی کننگ ءِ۔ وزیراعظم اومیت ظاہر کرے کہ صدر شی جن پنگ نا پنچ سال انا کماشی ٹی مد اٹی ہڑتوم آ ملک آتا آزموندہ و سدابہار سٹریٹجک کوآپریشن پین سوگو مریک۔ نن صدر شی جن پنگ، چین نا حکومت و الس کن نیک است خواہی نا درشانی ءِ کینہ۔

(اے پی پی)