نواز شریف دخس وخت لندن اٹ ئس، ہسپتال اٹ انتئے داخل متو، عدالت

اسلام آباد (مانیٹرنگ ڈیسک) اسلام آباد ہائی کورٹ نا کنڈآن سرینڈر کننگ کن تروک آ مہلت ایسر مس و نواز شریف سرنڈر کتو۔ اسلام آباد ہائی کورٹ ایون فیلڈ و العزیزیہ ریفرنس اٹ نواز شریف نا اپیل آتیا سماعت کرے و او وخت آ مسکوہی وزیراعظم ءِ تروک آ مہلت نا معاملہ ہم زیر بحث بس۔ جسٹس عامر فاروق و جسٹس محسن اختر کیانی استا بینچ نواز شریف نا سزا نا برخلاف اپیل آتیا سماعت کرے۔ عدالت سماعت اٹی پارینے کہ دا کانودی ٹک آ عدالت نا کمک ءِ کے کہ مگہ اشتہاری دوبہ دار آٹا سرینڈر  کننگ آن بیدس پین ہچ ءُ کیس اسے ٹی اونا درخواست ءِ نہ بننگک؟ جسٹس عامر فاروق ریمارکس تس کہ نوازشریف 19 نومبر آ پیشن ملک آ ہنا، 4 ہفتہ نا وخت دسمبر اٹ ایسر مس و بنجائی حکومت دا وخت اسکان اونا جانجوڑی ءِ معلوم کننگ نا ہچ ءُ کوشست اس کننگ کتو۔ جسٹس عامر فاروق پارینے کہ یانو عدالت نا مون آ بیرہ دا سوج ءِ کہ اشتہاری مننگ آن پد مگہ نن نواز شریف نا درخواست آ سماعت کننگ کینہ؟اشتہاری دوبہ دار نا سرینڈر کننگ المی ءِ۔ جسٹس محسن اختر کیانی ریمارکس تس کہ ہرا ڈاکٹر نا میڈیکل سرٹیفکیٹ ءِ جمع کرفنگا او تینٹ  امریکہ ٹی ءِ وخت اس کہ نواز شریف تدوک آ ہفت ہشت تُو آن ءِ لندن اٹی ءِ۔ او ہسپتال اٹ ہم داخل متو۔ او وخت آ نواز شریف نا وکیل خواجہ حارث پارینے کہ دا بابت اٹ مالو ہم عدالت ءِ پارینٹ، نن خوانہ کہ نواز شریف نا درخواست و اپیل آتے بنر۔ جسٹس محسن اختر کیانی پارینے کہ داڑاکن نن مالو  مفرور ڈیکلیئر کینہ و ولدا اپیل ءِ بننہ۔ خواجہ حارث پارینے کہ انڈرٹیکنگ اٹ جوان وڑ اٹ نوشتہ کرینے کہ ہائی کمیشن نا نمائندہ نا کمک اٹ جانجوڑی نا جاچ ءِ ہلنگک۔ سماعت نا وخت آ ایڈیشنل اٹارنی جنرل پارینے کہ نن نواز شریف نا جانجوڑی نا معلومدار کتون انتئے کہ او ہسپتال اٹ داخل آخا و درمان ہم متنے۔ داڑا جسٹس محسن اختر کیانی پارینے کہ نواز شریف ءِ وارخواہی تسوسن کہ او سرینڈر کرے۔ دا وخت اسکان نوازشریف ءِ حاضری آن استثنیٰ ہم تنگتنے۔ جسٹس عامر فاروق پارینے کہ دا ٹک آ عدالت نا کمک ءِ کننگے کہ اگہ کیس اٹ کس اس اشتہاری مرے تو مگہ ایلو کیس اٹ اودے بننگک؟ ہندا ٹک آ بڑزکو عدالت آتا فیصلہ  بطور حوالہ جات جمع کرفنگے و بروک آ سماعت آ دلائل تننگے۔