پِر و نوکاپ آن زہمی تا بحالی کن ہروڑ انا گام گیج کننگ اُن، وزیر اعلیٰ بلوچستان

0

Get real time updates directly on you device, subscribe now.

کوئٹہ (اے پی پی) وزیراعلیٰ بلوچستان جام کمال خان پارینے کہ صوبائی حکومت پِر و نوکاپ آن زہمی بندغ آتا بحالی کن ہروڑنا گام گیج کننگ ءِ ، پِر و نوکاپ آن زہمی علاقہ غاتیٹی ہلہلہ ئی بنداوتیا ریلیف نا کاریم برجاءِ ، صوبائی حکومت خواری نا دا ساہت آتیٹی تینا الس ءِ تنیا الیپک، ضلع ہرنائی نا ایلو اہم و بنداوی ویل آتے ایسر کینہ۔ دا خیال آتا درشانی ءِ او بلوچستان نا علاقہ ہرنائی نا ہلہلہ ئی دورہ ءِ کننگ نا وخت آ گپ وتران کرسا کرے دورہ ٹی صوبائی وزیر حاجی نور محمد خان دمڑ، سردار یار محمد رند، ضیاءلانگو، سلیم احمد کھوسہ، محمد خان لہڑی و ڈی جی پی ڈی ایم اے عمران زرکون اسک ہم اوڑتون اوار ئسر۔ وزیراعلیٰ و صوبائی وزیر آک ہیلی کیپٹر نا کمک اٹ ہرنائی آ سرمسر، وزیراعلیٰ نا ہرنائی آ سرمننگ آ باسک صوبائی اسمبلی گودی لیلیٰ ترین، ڈپٹی کمشنر ہرنائی محمد عظیم جان دمڑ و قبائلی متبرآک اودے بخیر کریر۔ ڈپٹی کمشنر ہرنائی عظیم جان دمڑ وزیراعلیٰ ءِ پِر و نوکاپ آن مروک آ نسخان تیا حوال تس۔ داوخت آ وزیراعلیٰ بلوچستان نوکاپ آن زہمی تا بحالی و نسخان تا پوروی ءِ کننگ نا پڑو ءِ کرے۔ وزیراعلیٰ بلوچستان میر جام کمال خان سروتی رکھی بند، کلی مرزائی رکھی بند انا تعمیراتی ءِ زوت آن زوت پورو کننگ نا ہم پارت کرے۔ وزیراعلیٰ بلوچستان جام کمال خان ہرنائی سنجاوی پنجاب قومی شاہراہ غا اِر ابرج(رابطہ پول) تفنگ نا ہم پڑو ءِ کرے۔ داوخت آ باسک صوبائی اسمبلی گودی لیلیٰ ترین وزیراعلیٰ بلوچستان میر جام کمال کان و ایلو صوبائی وزیر آتا ہرنائی نا دورہ ءِ کننگ آ منت واری ءِ ہرفے۔ داکان بیدس وزیراعلیٰ بلوچستان نا نوکاپ نا گواچی علاقہ غاتا فضائی دورہ، چنکو دورہ سے آ سبی آ سرمس۔ کمشنر سبی ڈویڑن سید فیصل آغا و ڈپٹی کمشنر سبی ڈاکٹر محمد یاسر بازئی و ایلو آفیسر آک اودے بخیر کریر۔ وزیراعلیٰ بلوچستان و صوبائی وزیر آک ہیلی کیپٹر نا کمک اٹ سبی آ سرمسر، وزیراعلیٰ بلوچستان ءِ کمشنر سبی و کمشنر نصیر آباد ساڑی آ پِر و نوکاپ نا بابت حوال تسر۔ اوکان پد وزیراعلیٰ بلوچستان جام کمال خان عالیانی چنکو دورہ سے آن پد بولان آ روانہ مس، وزیراعلیٰ بلوچستان ضلع بولان نا نوکاپی نسخان تا فضائی جاچ ءِ ہلیک۔ وزیراعلیٰ بلوچستان بولان و جھل مگسی نا دورہ ءِ کننگ آن پد کوئٹہ کن روانہ مریک۔ ہندن وزیراعلیٰ بلوچستان جام کمال خان اسہ دے ئی دورہ غا بلوچستان نا علاقہ جھل مگسی آ سرمس، وداوخت آ وزیراعلیٰ بلوچستان جھل مگسی نا نوکاپ آن زہمی علاقہ غاتا فضائی جاچ ءِ ہلک صوبائی وزیر آبپاشی نوابزادہ میر طارق خان مگسی، نوابزادہ میر محمد جعفر خان مگسی، نوابزادہ میر زراین خان مگسی، اسسٹنٹ کمشنر جھل مگسی گنداوہ اعجاز سرور و اسسٹنٹ کمشنر جھل مگسی عقیل کریم بلوچ اسک وزیراعلیٰ ءِ بخیر کریر۔ 

Get real time updates directly on you device, subscribe now.

Leave A Reply

Your email address will not be published.