چمن، مال روڈ آ بمب دھماکہ، 5 بندغ زوال ، 17 بندغ ٹھپی مسر

کوئٹہ (اے پی پی) چمن نا علاقہ مال روڈ آ موٹرسائیکل اسے ٹی تخوک بمب دھماکہ، 5 بندغ زوال وخت اس کہ 17 بندغ ٹھپی مسر، سرکاری حوالی نا رداٹ دوشنبے نادے آ بلوچستان نا سیمی علاقہ چمن مال روڈ آ اناگت اسہ ترند ءُ دھماکہ اس مس ہراٹی حکمت اللہ، محمد شفیع، محمد جلیل تون اوار پنچ بندغ زوال مسروخت اس کہ ٹھپی مروک آتیٹی صلاح الدین، حمید، لعل شاہ، محمد غوث، عبدالناصر، شاہ محمود، ناصر، میر حمزہ، عبدالواحد، راضیمہ، محمد علی، جلال و سراج اوار ءُ۔ پولیس و کانود نافذ کروک آ ادارہ غاتے حوال ملنگ تون واقعہ نا جاگہ غا سرمرسا لاش و ٹھپی تے دمدستی وڑاٹ ہندی ہسپتال آ مون تسر وخت اس کہ 4 بندغ ءِ پین درمان کن کوئٹہ غا گدریفنگا، پولیس و کانود نافذ کروک آ ادارہ غاک مستی جاست و پاست نا بناءِ کرینو، دھماکہ غان پد چمن شارانا سیکورٹی ءِ پین سخت کننگانے۔ سیکرٹری ہیلتھ بلوچستان جمال دوستین چمن دھماکہ نا ٹھپی تا سول ہسپتال کوعئٹہ غا اتنگ نارداٹ ایمرجنسی نافذ کرینے۔ سول ہسپتال کوئٹہ نا ایم ایس ڈاکٹر فضل الرحمان بگٹی نا کماشی ٹی آرتھو پیڈک سرجنز، نیوروسرجنز و جنرل سرجنزبمعہ پی جیز ڈاکٹر نا ٹیم فارماسسٹ، نرس، پیرامیڈیک اسٹاف و شعبہ حادثات ناعملہ الرٹ ساڑی ءِ ، ایمرجنسی جنرل و آرتھو پیڈک آپریشن تھیٹر نا انستھزیا نا ڈاکٹربمعہ پی جیز و ایلو عملہ ہم الرٹ ءُ وخت اس کہ ہر ہسپتال اٹی ہر وڑنا ایمرجنسی حالیت آتون مون تننگ کن تیار ءُ۔ وزیراعلیٰ بلوچستان جام کمال خان نا چمن بمب دھماکہ نا مذمت، وزیراعلیٰ دہشت گردی نا لغوری کارروائی ٹی نہادی جانی نسخان تیا است ہسونی نا درشانی ءِ کرسا پارے کہ دہشت گرد زموار آک تینا ناپاک مسخت آتا دوئی کننگ کن چمن نا امن ءِ بھس کننگ خوارہ، پاک اوغان بارڈر آ باڑ خلنگ نا ڈٹ ملک دشمن تا ناپاک عزم انا کسر اٹ اڑاند اسے۔باڑخلنگ آن دہشت گردی و غیر کانودی ہن و بر چٹک و سیمی علاقہ غاتون اوار مچ آ صوبہ ٹی امن و ایمنی نا حالیت آتیٹی گچینی بریک، وزیراعلیٰ بلوچستان دہشت گردی نا پورو چٹفنگ کن پکا عزم انا درشانی ءِ کرسا پارے کہ الس نا کمک اٹ چمن تون اوار غٹ علاقہ غاتیٹی پبی امن ءِ ہرحال اٹ پک کننگک، چمن نا پرامن و محب وطن الس نا جان و مال و روزگار نا رکھ ءِ اولیت ایتنہ، او شہید آتا خاہوت آتون ہڑزخواہی و ہمدردی نا درشانی ءِ کرسا ٹھپی مروک آتے درمان نا گچین آسراتی تا پارت کرے۔