بلوچستان اٹ امن و ایمنی نا دشمن تا عزم آن بلد اُن،لیاقت شاہوانی

کوئٹہ (اے پی پی) ترجمان حکومت بلوچستان لیاقت شاہوانی چمن اٹی سیکورٹی فورس آتا گاڈی آ بمب دھماکہ نا ترند انگا لوز آتیٹی مذمت ءِ کرسا پارینے کہ پاکستان و خاص وڑاٹ بلوچستان اٹ امن و ایمنی نا دشمن تا عزم آن بلد اُن ، امن دشمن تا اسُل رند ءِ الیپک، نوکاپی حالیت آتا سوب شکست آتیٹی داتم اسکان 10 بندغ زوال مسنو، بلوچستان اٹی تدوک آ مسہ تُو اٹی کورونا، ملخ وداسہ پِر و نوکاپی حالیت آتون مون تننگ اُن، پی ڈی ایم اے تون اوار تعلقدار ادارہ غاک پورو وڑاٹ ہائی الرٹ مرسا کمکی کارروائی تیٹی اختہ ءُ ، داخیال آتا درشانی ءِ او پریس کانفرنس آن تران کرسا کرے۔ ترجمان حکومت بلوچستان لیاقت شاہوانی پارے کہ وزیراعلیٰ بلوچستان غٹ تر باندات آتا تینٹ چاروکی ءِ کننگ ءِ ، پِر تا سوب ڈیم تیٹی دیر انا کچ خطرناک حد اسکان ودانے، دمدستی وڑاٹ نوکاپی حالیت آتون مون تننگ کن کنٹرول روم جوڑ کننگانے، اوپارے کہ پی ڈی ایم اے گچین پلاننگ نا رداٹ کمکی کارروائی تے برجاتخے، یانزدہ سد پیکیج ہرافتے ٹی خور، دوائی کمبل اوار ءُ زہمی ضلع غاتے راہی کننگانے، ہیلی کیپٹر تون اوار اوار گاڈی و اوچ آتیا ہم ریسکیو آپریشن ءِ برجاتخنگا بی بی نانی زیات نا پول انا پِننگ آن کوئٹہ سبی شاہراہ بند مس، ترجمان حکومت بلوچستان پارے کہ ریلوائی آن خواست کننگاکہ ڈغاری رابطہ نا بحالی اسکان خصوصی شٹل سروس نا بناءِ کننگا۔ بی بی نانی و پنجرہ پول پورو وڑاٹ بحال متنو، وزیراعلیٰ بلوچستان زہمی ضلع غاتا دور غاٹی ءِ ہموڑے نسخان تا کساس ءِ خلنگ انگ ءِ ، نیشنل ہائی وے اتھارٹی آن خواست کرینن کہ ریسکیو آپریشن اٹ ننتون کمک کے، قومی شاہراہ تا بحالی ٹی این ایچ اے ننا پبی کمک ءِ کرے، پاک فوج و سیکورٹی فورس آک ہم ریسکیو و ریلیف آپریشن اٹ ننا کمک ءِ کننگ ءُ۔ اوالس آن خواست کرے کہ بے گرج سفر آن پاناد کیر۔