اقوام متحدہ نا لیبیا ٹی درملکی نیام تمنگ نا ترندی اٹ مذمت

اقوام متحدہ (اے پی پی) اقوام متحدہ ناسیکرٹری جنرل انتونیو گوٹریش لیبیا ٹی درملکی نیام تمنگ نا ترندی اٹ مذمت ءِ کرینے۔ سلامتی کونسل نا کنڈآن وزارت کانفرنس آن ویڈیو تران اٹی انتونیو گوٹریش پارے کہ لیبیا نا دارالحکومت طرابلس و بن غازی نا نیام اٹ سرت شار انا فوجی محاصر گڑتی نا سوب ءِ۔ اونا پاننگ ءِ کہ لیبیا ٹی برجا جنگ و جھیڑہ پیشن نا نیام تمنگ آن غیر مسبوق ءُ مرحلہ اسے ٹی پترینگانے۔ پیشن نا ملک آن لیبیا ءِ سلہہ و جنگوڑوآتا فراوانی حالیت آتے پین پیچیدہ کرینے۔ اوپارے کہ نن لیبیا ٹی گدریفوک آ درملکی جنگوڑوآتا بے دخلی آ ہیت و گپ کرینن۔ لیبیا نا متحارب کڑدہ غاتے جنگ ءِ تورسا ہیت وگپ انا کنڈآ بروئی مریک۔ داکان بیدس متحدہ عرب امارات نا وزیر مملکت خارجہ امور انور قرقاش سلامتی کونسل نا کنڈآن اڈ ہلوک آ کانفرنس آن تران اٹی پارے کہ پیشن نا نیام تمنگ لیبیا نا حالیت آتے پیچیدہ کرینے۔ اونا پاننگ ئس کہ امارات لیبیا نا تنکی تے قاہرہ اعلامیہ و برلن اٹی مروک آ فیصلہ غاتے مون آ تخسا ایسر کننگ نا خواہندار ءِ۔ دیوان آن تران اٹی الجزائر نا وزیر خارجہ امور صبری بوقادم لیبیا نا غٹ متحارب کڑدہ غاتیان جنگ ءِ تورسا مذاکرات ءِ بناکننگ نا گرج آ زور شاغا۔