سعودی و یو اے ای تون گرانٹ آخا اسٹریٹجک پلان آ ہیت کرین، حکومت

اسلام آباد:بنجائی وزیرحوالکاری مریم اورنگزیب پارینے کہ کابینہ نا دیوان اٹ وزیراعظم سعودی عرب و یو اے ای نا دورہ نابابت جم آگاہ کرے‘اولیکو نن سنگت ملک آتیا اسہ ہندن ءُ اسٹریٹجک پلان اس درین ہرا بیرہ گرانٹ آ آخا بلکہ پاکستان نا الس کن پراجیکٹ، روزگار، ریلیف نا سہ پورو ءُ وژن اسے آ تالان ءِ‘ عئید انا دے یو اے ای آن اقتصادی چاہندار آتا ڈل اس ہم پاکستان آ بس۔ دا خیال آتا درشانی ءِ او کابینہ نا دیوان آن پد میڈیا ءِ بریفنگ ترسا کرے‘او دا ہم پارے کہ ننا اقتصادی، توانائی و پاور نا ٹیمک ہندا ڈٹ آتیا کاریم کننگ اٹی ءُ الس ءِ آگاہ کینہ کہ ہرا ہرا ڈٹ آتے سعودی عرب و یو اے ای نا اواری اٹ پورو کننگک۔ داوخت آ بنجائی وزیر توانائی انجینئر خرم دستگیر پارے کہ کابینہ ءِ ملک اٹ بجلی نا حالیت آتابابت جم بریفنگ تننگا‘ حکومت تون الس ءِ ریلیف رسیفنگ ناپلان ارے‘ ٹرانسمیشن، لوڈ شیڈنگ آ پرو جم حکمت عملی جوڑ کننگانے‘ انرجی مکس، کنزرویشن پلانز، انرجی کنزرویشن پالیسی آ بنجائی وزیر توانائی بریفنگ ایتک‘ تدوک آچار سال اٹ خولم نا دسنگ نا وخت آ ہچ ءُ آسراتی اس تننگتو۔2018ء ٹی ڈی اے پی نا اسہ گونی 2600 روپئی آ ئس ہرا دا وخت آ 10 ہزار روپئی آرسینگ انگ ءِ‘ ہرا وخت آ خولم دسنگاکہ ہمو وخت آ ڈی اے پی الو‘ ملک اٹ خولم نا حالیت آتے مون آ تخسا کابینہ مسہ ملین میٹرک ٹن امپورٹ نا موکل تس ہراکہ بیرہ اسہ خاص ءُ مُد اسیکن ءِ‘ 2018ء ٹی ہراتمم مسلم لیگ (ن) نا حکومت چٹا ہمو وخت آ پاکستان خولم ایکسپورٹ کریکہ‘ وزیراعظم بنجائی وزیر غذائی تحفظ ءِ پارت کرینے کہ دمدستی ہندن ءُ پلان اس ترتیب تننگے ہرانا رد اٹ نئے بیرہ خولم ناپیداوار ودے بلکہ پاکستان خولم برآمد کننگ کے۔ محمد مسعود ءِ ڈائریکٹر انڈسٹریل اینڈ کمرشل ریلیشن شپ، ءِ بطور ممبر پاکستان آرڈیننس فیکٹری تعینات کننگ نامنظوری تننگا‘ کابینہ ایڈمرل (ر) سلمان الیاس ءِ ایم ڈی شپ یارڈ انجینئرنگ ورکس نا ڈائریکٹر نا وڑ تعینات کننگ نا منظوری تس‘ کابینہ 1974ء نا پاسپورٹ ایکٹ انارد اٹ اسٹ آن زیات درملکی پاسپورٹ ءِ منسوخ کننگ نامنظوری تس‘ کابینہ فیصلہ کرے کہ ہندا وڑ انا پاسپورٹ آتے نئے بیرہ منسوخ کننگے تاکہ آخبت اٹ دانا توننگ کن حکمت عملی تینائی کننگے‘ کابینہ اِرا پاسپورٹ منسوخ کننگ نا گڈیکو تاریخ ءِ 31 دسمبر 2022ء پک کرینے‘ ہمو وخت اسکان پروسیجرل و انتظامی امور تے پورو کننگ ناپارت کرے‘ داڑتون اوار کابینہ اقتصادی رابطہ کمیٹی نا 9 مئی انا دیوان نا فیصلہ غاتے پک کرے‘ رمضان پیکیج نا رد اٹ نت و بورہ نا پک کروک نہاد آتے آخبت اٹ ہم برجا تخنگ نافیصلہ کننگا۔ 20 کلو نت انا تھیلی نا نہاد ءِ 950 روپئی آن کم کرسا 800 روپئی کننگاسس ہندا وڑ بورہ 85 روپئی کلو آن 70 روپئی کلو کننگاسس‘ کابینہ منظوری تسنے کہ ہندا ریٹ آ اوفتا نہاد آتے برجا تخنگے۔ کابینہ پاکستان ناالس ءِ ریلیف نا فراوانی ناپارت جاری کرے‘ بنجائی کابینہ فواد اسد اللہ خان ءِ ڈی جی آئی بی تعینات کننگ نامنظوری تس‘ کابینہ لیفٹیننٹ جنرل مزمل حسین نا ا چیئرمین واپڈا ناعہدہ غان استیفہ ءِ منظور کرینے‘ ممبر فنانس واپڈا ءِ چیئرمین واپڈا نا تعیناتی نا پراسیس ناپورومننگ اسکان چیئرمین واپڈا نا عہدہ نا ودکی چارج تننگانے۔ اوپارے کہ عمران خان ناکنڈآن پنجاب اٹ دوارہ آئین شکنی نا سازش کننگ انگ ءِ۔