پاکستان نا محافظ آتیٹی ہر گڑتی تون مون تننگ نا پبی بود ارے،وزیراعلیٰ میر سرفراز بگٹی

وزیراعلیٰ بلوچستان میر سرفراز بگٹی صوبہ نا جتا جتا علاقہ غاتیٹی سیکورٹی فورس آتاسرسہب کارروائی تیا است جمی نا درشانی ءِ کرسا پاک فوج، بلوچستان پولیس، ایف سی و ایلو کانود نافذ کروک ادارہ غاتا افسر و کارندہ غاتا جیرت، کسبی لائخی و فرض شناسی نا گچین لوز آتے ٹی ستاءِ کرینے۔ وزیراعلیٰ تینا بیان اٹی پارے کہ بلوچستان اٹی دہشت گردی نا پوسکن آ واقعہ غاک پاکستان نا امن، شونداری و قومی سوگوی ءِ نسخان رسیفنگ نا اسہ منظم سازش اسے، ولے ریاستی ادارہ‘ حکومت و الس پورو سیوت و سوگو عزم اٹ دشمن نا ہر ناپاک آ ڈٹ ءِ بے سہب کننگ نا پورو بود تخک۔ او پارے کہ دہشت گردی نا کمک اٹ بلوچستان نا امن، شونداری و السی پت ءِ نزور کننگ نا ہر کوشست مہالو ہم بے سہب مسنے و بروک آ وخت اٹی ہم بے سہب مریک۔ میر سرفراز بگٹی پارے کہ سیکورٹی فورس آتا بہادر آ ورناک بھلو جیرت، کسبی لائخی و وخت آ کارروائی نا کمک اٹ دہشت گرد آتے پبی ورندی تسر و دا پک کریر کہ پاکستان نا محافظ آک ہر گڑتی تون مون تننگ نا پورو بود تخرہ۔ او پارے کہ وطنِ عزیز نا امن و الس نا رکھ اکن تینا جان تے ندر کروک شہید آک مچ آ قوم انا گمر ءُ، ہرافتا بھلا قربانی تے مدام جوان انگا لوز آتیٹی یات تخنگک۔ وزیراعلیٰ پارے کہ خاران و دالبندین اٹی دہشت گرد آتا برخلاف سرسہب کارروائیک دا ہیت انا پیدوار شاہدی ءُ کہ ریاست دہشت گردی نا پورو چٹفنگ کن پرعزم ءِ او پارے کہ دہشت گرد، اوفتا کمکار و کاٹم خواجہ غاتا برخلاف بے فرق آن کارروائیک برجا سلرہ و ہچ کس ءِ بلوچستان نا امن، الس نا آخبت و برجا شونداری عمل ءِ نسخان رسیفنگ نا موکل تننگپک۔ او پارے کہ بلوچستان پاکستان نا جان و شان ءِ و اونا شونداری، شونہالی و سوگوی ءِ نسخان رسیفنگ نا ہر سازش ءِ الس و ریاست نا تین پہ تینی سیوت اٹ بے سہب کننگک۔ حکومت بلوچستان الس نا جان و مال انا رکھ، مدامگی امن نا برجائی و صوبہ نا شونداری کن غٹ وسیلہ غاتے کاریم اٹ اتنگ اٹی ءِ۔ وزیراعلیٰ میر سرفراز بگٹی دا ارادہ نا دوارگی ءِ کرے کہ دہشت گرد، اوفتا کمکار و کاٹم خواجہی کروک آک ہراڑے ہم مریر، اوفتے کانود نا دنگ اٹی اتسا اوفتے اوفتا ایسر اسکان سر کننگک۔ او پارے کہ دہشت گردی نا برخلاف جنگ گڈیکو دہشت گرد نا چٹفنگ اسکان پورو واکداری، قومی یکجہتی و سوگو ارادگی اٹ برجا سلک۔