دنیا نا ہچ ءُ زوراک اس پاکستان ءِ شیف خلنگ کپک،لیفٹیننٹ جنرل احمد شریف چوہدری

پاک فوج انا محکمہ تعلقات عامہ (آئی ایس پی آر) نا ڈائریکٹر جنرل لیفٹیننٹ جنرل احمد شریف چوہدری پریس بریفنگ ترسا پارینے کہ دنیا نا ہچ ءُ زوراک اس پاکستان ءِ شیف خلنگ کپک۔ بھارت بلوچستان اٹی دہشت گردی کرفنگ اٹی ءِ۔ صوبہ پاکستان نا شان شرف و جان ءِ، و ڈیہہ انا شونداری ءِ دشمن آک کیدنگ کپننگ اٹی ءُ۔ ریاست نا دہشت گردی نا برخلاف موقف پیدوار و سخت ءِ، دہشت گرد آتا ہر کہول اسکان رند ءِ دننگک۔ گدرینگوک آ مسہ دے ٹی آپریشن نا وخت آ 42 ورنا شہید و 54 دہشت گرد جہنم واصل مسنو۔ بلوچستان اٹی سیکورٹی حالیت آتیا بریفنگ ترسا او پارے کہ گدرینگوک آ چار دے اٹی بلوچستان اٹی دہشت گردی نا مسہ بھلو واقعہ مسنو ہراٹی دہشت گرد آک کودک آ شاری تے شست کرینو۔او پارے کہ اولیکو واقعہ چار و پنچ جولائی نا نیامی نن پیش بس ہراٹی چار کودک شاری شہید مسر۔ شش جولائی آ دہشت گردی نا ارٹمیکو واقعہ منگی ڈیم پمپنگ اسٹیشن نا خڑک آ پیش بس۔ منگی ڈیم، کوئٹہ پمپنگ اسٹیشن نا علاقہ ٹی ہم دہشت گردی نا واقعہ پیش بس، ولے بلوچستان نا بہادر آ الس و پولیس کارندہ غاک جیرت و بہادری اٹ دہشت گرد آتتون مون تسر و پانزدہ دہشت گرد ءِ خلکر۔ پولیس نا 9 ورنا دا جنگ اٹ شہید مسر۔ دا وخت آ خوارجی آک 18 کارندہ ءِ بندی کرسا دریر‘ سیکورٹی فورس آک اوفتا پد اٹ ہنار تانکہ بندی تے آجو کننگ مرے ولے دہشت گرد آک کل 18 ورنا ءِ شہید کریر۔ دا وخت آ کیہی خارجیک ہم خلنگار۔ او پارے کہ دہشت گردی نا مسٹمیکو واقعہ زیارت اٹی پیش بس ہراڑے دہشت گرد آک پولیس چوکی ءِ شست کریر ہراٹی 9 پولیس کارندہ شہید مسر۔ پولیس نا ورناک بہادری اٹ مقابلہ کرسا 14 دہشت گرد ءِ خلکر۔ ترجمان پاک فوج پارے کہ دا مسہ واقعہ ٹی وطنِ عزیز نا دفاع ءِ کرسا 42 ورنا شہید مسر وخت اس کہ 54دہشت گرد خلنگار۔ خلنگوک دہشت گرد آتا گیشتری کچ اوغانی ءُ۔ او پارے کہ دہشت گرد و اوفتا کمکار آتا پورو چٹفنگ اسکان کارروائیک برجا سلرہ۔ ترجمان پاک فوج بلوچستان ءِ پاکستان نا جان، شان و شرف گوندسا پارے کہ پاکستان نا شونداری و شونہالی نا دشمن آک بلوچستان اٹی دہشت گردی کرفنگ اٹی ءُ۔ دہشت گرد آک دعویٰ کیرہ کہ او بلوچستان و اسلام نا جنگ ءِ کننگ اٹی ءُ، زیارت اٹی شہید مروک کل پولیس کارندہ غاک ہندی ومسلمان ئسر۔ بھارت بلوچستان اٹی دہشت گردی کرفنگ اٹی ءِ و اوغان ڈغار ءِ بھارت نا کنڈ آن دہشت گردی کن کاریم اٹ اتنگ نا پیدوار ءُ شاہدی ارے۔ ریاست پاکستان نا دہشت گردی نا برخلاف موقف اسُل پیدوار ءِ۔ فتنہ الخوارج نا اسلام تون ہچ ءُ تعلقداری اس اف۔ او پارے کہ نن دہشت گرد و اوفتا کمکار آتا ہر کہول اسکان پد اٹ کانہ۔ دنیا نا ہچ ءُ زوراک اس پاکستان ءِ شیف خلنگ کپک۔ کس اس ہم پاکستان ءِ خلیفنگ کپک۔