کلبھوشن سزا نا اولسر جاچ اپیل دائر کننگ آن نمن ءِ، ایڈیشنل اٹارنی جنرل

 اسلام آباد ( ا ٓن لائن )ایڈیشنل اٹارنی جنرل احمد عرفان پارینے کہ پاکستان اٹ دزگیر و سزا کنوک آ ایجنٹ کلبھوشن یادیو تینا سزا نا برخلاف نظرِ ثانی و داڑان ولدا سجفنگ کن اپیل دائر کننگ آن نمن ءِ، پاکستان تینا جہانی زمواری تیان جوان پہہ و پاکستان آئی سی جے نا فیصلہ غا عملدرآمد کن تیار ءِ۔ تدوک آ دے دفتر خارجہ ٹی ایڈیشنل اٹارنی جنرل احمد عرفان ڈائریکٹر جنرل جنوبی ایشیا، سارک زاہد حفیظ تون اوار نیوز کانفرنس کرسا پارینے کہ جہانی عدالت انصاف اٹ ہرا کیس ءِ پاکستان کٹاسُس اونا فیصلہ کن اہم انگا ٹِک آتیٹی دا ہیت ہم اوار ئس کہ ویانا کنویشن برائے قونصلر روابط نا دفعہ 36 نا رداٹ کلبھوشن یادیو ءِ اونا حق آتا بارواٹ پاننگے۔ او پارینے کہ فیصلہ ٹی دا ٹِک ہم اوار ئس کہ بھارتی قونصل افسر آتے کلبھوشن یادیو تون ہیت وگپ نا موکل و قونصلر رسائی تننگے تانکہ اوفک اوڑتون اوڑدہی کیر و اوڑکن کانودی نمائندگی نا بست و بند ءِ کیر۔ داڑان بیدس فیصلہ ٹی پاننگاسُس کہ کلبھوشن کیس آ جوان نظر ثانی کن ہروڑ نا گام گیج کننگے ہراٹی اگہ گرج مس تو کانود سازی نا نفاذ ہم اوار ءِ، او ہراتم اسکان جوان نظرِ ثانی و ولدا سجفنگ پورو مفک او وخت اسکان پاہو نا سزا ءِ توننگے۔ ایڈیشنل اٹارنی جنرل پارینے کہ حکومت پاکستان جہانی عدالت انصاف نا فیصلہ غا عملدرآمد کرسا کیہی گام گیج آتے کرینے۔