چمن سیم آ ہن وبر کن پاسپورٹ نا نظام ءِ رائج کننگ مفک‘ اصغراچکزئی
Get real time updates directly on you device, subscribe now.
کوئٹہ (آن لائن) عوامی نیشنل پارٹی نا پارلیمانی لیڈر وصوبائی صدر اصغرخان اچکزئی پارینے کہ پاک اوغان چمن سیم آ ہن وبر کن پورو وڑ اٹ پاسپورٹ نا نظام ءِ رائج کننگ مفک‘ سیمی واپاری آن قلعہ عبداللہ نا 20 آن 25 ہزار خاہوت نا روآن راست روزگار گنڈوک ءِ‘ کوئٹہ تون اوار صوبہ نا زرگزران نا بھلا بشخ سیمی واپاری آ سیبو کیک بلکہ چمن نا تو ہچ مف 98درسَد آبادی نا زرگزران ہندا سیم آٹے۔ اسلام آباد یا کوئٹہ ٹی تولسا ہزار آ بندغ آتا روزگار ءِ پلنگ و چمن سیم انا بابت سخت ءُ فیصلہ کننگ دانشمندی اس مفک بلکہ داڑان بلوچستان نا پشتون علاقہ غاتے ٹی ہم بلوچ علاقہ غاتیانبار حالیت ودی مریک‘ بے روزگاری ودا تو دشمن واکدار آک بے روزگار ورناتے تینا مسخت کن کاریم اٹ اتنگ کیرہ۔دا خیال آتادرشانی ءِ او درملکی میڈیا تون ہیت وگپ کرسا کرے۔ سیمی ویل آ ٹہیفوک حکومتی کمیٹی نا باسک و چمن آن بلوچستان اسمبلی نا باسک عوامی نیشنل پارٹی نا صوبائی صدر اصغر خان اچکزئی پارینے کہ پاک اوغان چمن سیم آ ہن وبر کننگ کن پورو وڑ اٹ پاسپورٹ نا نظام رائج مننگ کپک‘ سیم آ ہڑدے 20 آن 25 ہزار بندغ بریرہ کارہ ہرافتیان گیشتری ہمو پاکستانی باتی و پوریاگرک ءُ ہرا سہب انا چمن آن کارہ و اوغان سیمی شار ویش و سپین بولدک اٹ اوپاری کیرہ و بیگہ نا پدی بریرہ۔