صوبہ نا آئینی سروک نا وڑ اٹ بے پرخ خذمت کیوہ، ملک ولی کاکڑ

کوئٹہ : گورنر بلوچستان ملک عبدالولی خان کاکڑ پارینے کہ صوبہ نا آئینی سروک نا وڑ اٹ بے پرخ آن الس نا خذمت کننگ آ باور کیوہ‘اوپارے کہ تینا زمواری تا سر تننگ ناوخت آ رنگ، نسل و علاقہ غاتے مون آ تخپرہ‘ ہندا ننا سیاسی ہیلکاری و سرکڑدہ غاتا تعلیم ءِ۔ دا خیال آتا درشانی ءِ او چار شنبے نادے مسکوہی اسپیکر بلوچستان اسمبلی و مسلم لیگ ن نا راہشون جمال شاہ کاکڑ ناکماشی ٹی اوڑدہی کروک ڈل اتون ہیت وگپ کرسا کرے۔ ڈل گورنر بلوچستان نا عہدہ ءِ سنبھالنگ آ اودے مبارکبادی تس‘ گورنر بلوچستان اونا و کمک کروک کل سیاسی جماعت خاص وڑ اٹ وزیراعظم پاکستان میاں شہباز شریف نا منت ءِ ہرفسا پار ے کہ داکان پد ہم الس ناخذمت نا بابت اوفتا کمک دوئی مریک۔ داکان بیدس گورنر بلوچستان ملک عبدالولی خان کاکڑ پارینے کہ السی آسودہی و الس نا ہڑدے ئی ویل آتے ایسر کننگ کن سرکاری محکمہ و ادارہ غاتا غیرسرکاری تنظیم (این جی اوک) ہم مثبت کڑدار ادا کننگ اٹی ءُ‘ ولے گرج دا گڑاناءِ کہ سرکاری ادارہ و غیرسرکاری ادارہ غاتا کارکڑد ڈغار ہم بایدے خننگے۔ دا خیال آتا درشانی ءِ او چار شنبے نادے بلوچستان رورل سپورٹ پروگرام نا کارکڑد نا بابت بریفنگ ناوخت آہیت وگپ کرسا کرے۔ بی آر ایس پی نا چیف ایگزیکٹو آفیسر طاہر رشید بریفنگ تسکہ۔ دا وخت آ گورنر بلوچستان پارے کہ کل شونداری ڈٹ آتا بھرم الس اسکان سرکننگ المی ءِ‘ گورنرپارے کہ کنا جند ءِ ڈکھ مریک ہراتم شونداری ڈٹ آتیا کروڑو ارب آ روپئیک خڑچ مریرہ‘ شاندار ءُ ماڑی مریک ولے اوفتیان چندی ماڑیک جوڑ مننگ آن پد ہم فعال افس‘گورنر بلوچستان پارے کہ الس نا پیسہ غاک بایدے الس آ خڑچ کننگر السی شونداری ڈٹ آتے بھرم تروک جوڑ کننگ آ پبی چکار کننگے۔

(خ ن)