ریاست ءِ یرغمال کرسا سیاسی خواست آتے منفنگ نا موکل تننگ مفک،معاون خصوصی رانا ثناء اللہ

اسلام آباد، وزیراعظم نا کنڈ آن اپوزیشن و تحریک انصاف ءِ مذاکرات نا سلہ نا حوالہ ءِ ترسا خصوصی کمکار رانا ثناء اللہ پارینے کہ حکومت ناکنڈآن مذاکرات نا درگہ غاک ملوک ءُ‘ ولے دا سلہ ءِ ہچ گہس ریاست ءِ یرغمال جوڑ کرسا سیاسی خواست آتے منفنگ نا وڑ جوڑ کننگ مفک۔ ریاستی رٹ و قومی فائدہ غاتیا ہچ سمجھوتہ کننگپک۔ پریس کانفرنس آن تران کرسا او پارے کہ وزیراعظم تدوک آ دے ہم اپوزیشن و پی ٹی آئی ءِ مذاکرات نا سلہ خلک، حکومت ہیت و گپ نا کمک اٹ سیاسی باندات آتے ایسر کننگ نا باور کیک ولے ریاستی رٹ و قومی فائدہ غاتیا ہچ گہس سمجھوتہ مفک‘ او پارے کہ 2014ء غان بنا مروک سیاسی چک وتاڑ ءِ 12 سال تدینے، پی ٹی آئی مدام ہندا ایجنڈا ءِ مستی اتنگ اٹی ءِ، ولے سیاسی بے سوگوی نا کمک اٹ اسہ خواست اسے ہم امنا کننگ مفک۔ او پارے کہ حکومت مذاکرات نا درگہ غاتے بند کتنے، وزیراعظم تدوک آ دے ہم اپوزیشن و پی ٹی آئی ءِ ہیت و گپ نا سلہ خلک، ولے ریاست ءِ یرغمال جوڑ کرسا سیاسی خواست آتے منفنگ نا موکل تننگپک۔ رانا ثناء اللہ پارے کہ 2014ء نا دھرنا غان پد آن اسلام آباد ءِ گھیڑ کننگ تحریک انصاف نا سیاست نا وڑ مسنے و داسہ اسہ وار ولدا پی ٹی آئی اسلام آباد آ جلہو کننگ نا کوشست کننگ اٹی ءِ۔ خیبرپختونخوا حکومت نا کل وسیلہ غاتے سیاسی مسخت آتیکن کاریم اٹ اتنگ انگ ءِ‘ او پارے کہ پی ٹی آئی نا بنداوی مسخت سیاسی بے سوگوی ودی کننگ سلیسنے و ہندا مسخت نا رد اٹ برانز و اسلام آباد ءِ گھیڑ کننگ نا سیاست ءِ مستی اتنگا۔ رانا ثناء اللہ پارے کہ پی ٹی آئی سیاست اٹی کرینگ نا کلچر ءِ درستی راستی کرفے، ہرانا سوب آن ملکی سیاست اٹی سیاسی رواداری نا چاگڑد بھاز زہمی مس۔ تحریک انصاف تینا دا ہڑتوم آ مسخت آتیٹی بھلو کچ اسے اسکان سرسہب مس و سیاسی بے سوگوی تون اوار سیاسی رواداری نا کلچر ہم نزور مس۔ او پیدوار کرے کہ حکومت سیاسی باندات آتے ٹی مذاکرات نا کمک اٹ ایسری کن تیار ءِ و ہیت و گپ نا درگہ غاک ملوک ءُ۔