پاکستان جموں و کشمیر نا حیثیت نا بابت بھارت نا دعویٰ تے منپک،سجاد حیدر خان

اسلام آباد، ترجمان دفتر خارجہ سفیر سجاد حیدر خان پارینے کہ پاکستان جموں و کشمیر نا حیثیت نا بابت بھارت نا بے بنداو دعویٰ تے مسترد کیک، ہرا جہانی وڑ اٹ امنا کروک راستکی تیان چَپ ءُ۔ بھارت نا تینا خودآن کروک گام گیج و پدریسہ کانودآن چَپ کوزہ جموں و کشمیر نا جہانی کہول آ امنا مروک جھیڑہ ئی حیثیت ءِ بدل کننگ کپک۔ بھارت نا وزارت خارجہ نا کنڈآن جھیڑہ ئی جموں و کشمیر نا نقشہ نا بابت جاری کروک بیان نا بابت میڈیا نا سوج آتا ورندی ءِ ترسا دوشنبے نادے آترجمان دفتر خارجہ پارے کہ جموں و کشمیر نا جھیڑہ اقوام متحدہ نا سلامتی کونسل نا ایجنڈا غا ساڑی متکن انگا ایسری کن ہُروک و جہانی کہول آ امنا مروک جھیڑہ غاتیان اسٹ ءِ۔ تعلقدار اقوام متحدہ نا قرارداد آتیٹی پیدوار کننگانے کہ دا جھیڑہ نا گڈیکو فیصلہ سلامتی کونسل نا تعلقدار قرارداد و کشمیری الس نا است خواہی تا رداٹ کننگے، ہرانا درشانی ءِ اقوام متحدہ نا چاروکی ٹی آجو و بے کنڈ ہلوک استصواب رائے نا کمک اٹ مرے۔ ترجمان پارے کہ اقوام متحدہ نا سرکاری نقشہ، ہرافتے ٹی جموں و کشمیر ءِ اسہ جھیڑہ ئی علاقہ اس نشان تننگانے، اونا ساڑی کانودی حیثیت نا اسٹ انگا مستند نقشہ ئی نمائندگی ءِ۔ بھارت نا پن اناسرکاری نقشہ و تینا جوڑ کروک وتواجہی نا دعویٰ غاتاجھیڑہ ئی علاقہ نا حیثیت آ ہچ ءُ زہم اس تمپک۔ ترجمان پارے کہ پاکستان جہانی برادری آ زور شاغک کہ او بھارت ءِ بھارتی کانودآن چَپ کوزہ ٹی جموں و کشمیر اٹی انسانی حق آتا خلاف ورزی تے دمدستی وڑاٹ توننگ و کشمیری الس نا وتواجہی نا حق انا دوئی کننگ کن تینا قول انا پورو کننگ آ منفے، ہرا تعلقدار اقوام متحدہ نا سلامتی کونسل نا قرارداد آتا رداٹ ءُ۔