ایئرمارشل ءِ پی آئی اے نا چیف ایگزیکٹو تعینات کننگ نا منظوری

اسلام آباد ( آن لائن/ اے پی پی )بنجائی کابینہ ایئرمارشل ارشد ملک ءِ پی آئی اے نا چیف ایگزیکٹو تعینات کننگ نا منظوری تسنے۔ پائلٹ آتا شکبر ڈگری تا بابت جانچ ءِ زُوت پورو کننگ نا پارت کننگانے، وخت اس کہ ایف اے ٹی ایف نا بابت کمپنی ایکٹ 2017ءٹی سلاہ ئی ترمیم نا باندات ءِ پد بٹنگانے، بنجائی وزیر حوالکاری و شینکاری سینیٹر شبلی فراز پارینے کہ کورونا دین انا برخلاف ساڑی حکومت نا حکمت عملی سرسہب مسنے، بھلا عئید انا وخت آ کورونا دین انا تالان مننگ نا گڑتی ءِ، وزیراعظم عمران خان بھلاعئید ءِ اُراٹی کننگ نا فیصلہ کرینے و الس آن ہم خواست کرینے کہ او بھلا عئید آ اُراتیٹی مریر۔ وزیراعظم نا خصوصی راجی رکھ کمکار ڈاکٹر ثانیہ نشتر ءِ احساس پروگرام نا ارٹ میکو مرحلہ ءِ بناکننگ نا پارت کرینے، حکومت کورونا دین و ساڑی زرگزرانی حالیت آتے ٹی متوازن بجٹ اس پیش کرینے۔ شکبر لیسن والا 28 پائلٹ آتے ملازمت آن کشانے، جعلی لیسن والا غٹ پائلٹ آتے پیپلزپارٹی و مسلم لیگ (ن) نا دور اٹ بھرتی کننگا، جعلی پائلٹ آتا معاملہ غا پی آئی اے و سول ایوی ایشن کمامدارآتا برخلاف کارروائی برجاءِ۔ داخیال آتا درشانی ءِ او سے شنبے نادے آ بنجائی کابینہ نا دیوان آن پد میڈیا ءِ حوال ترسا کرے۔ اوپارے کہ کورونا دین آن پاکستان دنیا نا ایلو ملک آتا مون اٹ کم زہمی مس، وزیراعظم عمران خان و حکومتی ٹیم انا ڈغاری راستکی تا رداٹ حکمت عملی سرسہب مسنے، منہ جماعت اس دا باندات سیاست کریر، جان جوڑی نا گچین نظام و زرگزرانی سوگوی آن پد ہم گڑاس ملک دادین انا جوان وڑاٹ مقابلہ ءِ کننگ کتوس۔ اوپارے کہ کورونا دین انابرخلاف این سی او سی نا کڑد سفت نا قابل ئس ہراٹی بنجائی وزیرآک، سیاسی و فوجی سرکڑدہ، صوبائی وزیراعلیٰ تتون اوار ایلو کمامدارآک اوار ئسر۔ داڑے سہی حساب وکتاب نا بنداو آ حکمت عملی اس ترتیب تننگاکہ ہرانا سوب لیبارٹری، ٹیسٹ نظام اٹ گچینی تون اوار ایلو گام گیج آتے کننگا۔ بناٹی اِرالیبارٹری ئسر، داسہ اوفتا کچ 129 مسنے، مہالو طبی گڑادرآمد کرینہ، داسہ برآمد کننگ اُن۔ اوپارے کہ امیریل کالج نا اسٹڈی آن ہم پک مریک کہ نن ہرا حکمت عملی ءِ اختیار کرین اوڑان کورونا کیس آتا گراف شیف ہِننگ ءِ۔