بھارت ، انڈونیشیا و سنگاپور اٹ زمی جمب‘ ہچ ءُ جانی ءُ نسخان اس متو

نئی دہلی / جکارتہ (آن لائن)بھارت، انڈونیشیا و سنگاپور اٹ زمی جمب ، زمی جمب نا خطرناک ءُ لوڈو اس محسوس کننگا۔ جکارتہ ٹی زمی جمب نا کچ6.8 ، سنگا پور اٹ 6 و بھارت اٹ 3.4 ریکارڈ کننگا وخت اس کہ دا زمی جمب آتیٹی ہچ ءُ جانی ءُ نسخان اسے نا ڈس رسینگتنے۔ حوال نا رداٹ بھارت نا شار دہلی تون اوار قطبی دے ٹکی ریاست اٹ آسام نا گوہاٹی ٹی زمی جمب نا لوڈو محسوس کننگانے داڑان بیدس ہریانہ ٹی کیہی وار زمی جمب نا لوڈو ہم محسوس کننگانے۔ ریاست ارونا چل پردیش نا تاونگ اٹ زمی جمب نا لوڈو اس محسوس کننگا۔ ریکٹر اسکیل آ زمی جمب نا کچ 3.4 ریکارڈ کننگا، سنگا پور نا سویل دے ٹکی علاقہ و انڈونیشیا ٹی ہم زمی جمب نا لوڈو محسوس کننگانے۔ انڈونیشیا ٹی ریکٹر اسکیل آ زمی جمب نا کچ 6.8 ریکارڈ کننگا وخت اس کہ سنگا پور اٹ ریکٹر اسکیل آ زمی جمب نا کچ 6.1 درج کننگانے۔ رپورٹ نا رداٹ دا زمی جمب آتیان ہچ ءُ جانی و مالی نسخان اسے نا ڈس دوئی متنے۔