ڈنک واقعہ : بیرہ دزگیری تیان ہچ مفک، سردار اختر مینگل

 اسلام آباد ، کوئٹہ : بلوچستان نیشنل پارٹی نا سروک و قومی اسمبلی نا باسک سردار اختر جان مینگل پارینے کہ کودک آ چنا برمش و اونا لمہ نا انت قصور ئس، بیرہ دزگیری آن انصاف مفک۔ دا وڑ انا واقعہ غاک پین ہم زیات اریر، بد بختی نا ہیت دادے کہ بلوچستان نا اسہ ضلع اس ہم دن مفرو ہراڑے چنا اس چوری متنے، بلوچستان اٹی اجتماعی قبر آک خننگانو، اوفتے دہشت گرد آک شہید کریسر، حکمران آک پار کہ ہراتم اسکان بلوچستان نا کودک آ مخلوق تون دا گوازی برجا سلک۔ ایفے سلہہ بند کروسا ورنا تے پاش آن پاش کسفنگ ءُ۔ گڑا دا خلوک آتے را، یا موساد نا ایجنٹ پاو، ہرافتے کسفنگ نا لیسن تننگانے۔ تاوان کن برمتہ کاری، منشیات نا اسمگلنگ، کاروبار کروک آتیان بھتہ کن باقاعدہ کارڈ تننگ کون آ ویل آک بلوچستان ءِ پلویڑ کرینو۔ ڈپٹی اسپیکر صاحب نی ہم ہمو علاقہ نا سے اُس، اگہ او علاقہ غان گدرینگ تو ننے و نے تینا درستی راستی ءِ کرفوئی تمک، بلکن آئی ڈی ہم نشان تروئی تمک، ولے ایفتے ہچ نشان تننگ نا گرج مفک، ہرافتے لیسن تننگانے۔ دا ہیت آتا درشانی ءِ او قومی اسمبلی نا دیوان اٹی گپ و تران کرسا کرے۔ او پارے کہ بد بختی نا ہیت اسے کہ اسہ کودک ءُ چنا سے نواریفنگ کن ہراتم سوج کننگک کہ انت اس خواسہ؟ پچ، کھلونا، یا چاکلیٹ؟ تو او پاہک کہ کنے کنا لمہ ءِ ایتبو۔ اونا لمہ ءِ نن ہراکان اتنگ کینہ؟ دٹی ہچ ءُ شک اس اف کہ سانحہ ڈنک انا وخت آ ہومجاگہ غا منہ خونی اسے و اوکان پد منَٹ اس پین دزگیر کننگا، سوج دا اف کہ دزگیر کننگ یا اِلنگک۔ دا نزوریک ساڑی اریر، کہ جاگہ غا ہلوک انگا دوبہ دار آک ہم یلہ مریرہ۔ و دا سوج ہم تینا جاگہ غا ارے کہ انتئے یلہ مریرہ؟ دا دیر ءُ کہ ہرافتا فوٹوک، وزیر و سلاہکار آتتون سوشل میڈیا غا ساڑی اریر، و اوفتا برخلاف کارروائی مفک۔ او پارے کہ بلوچستان نا ہر ضلع ٹی دا وڑ انا دہشت گرد ارے، ہرا صوبہ نا سیاسی جماعت آک ہرا سیاسی جہد کننگ اٹی ءُ، تا برخلاف کاریم اٹ اتنگرہ۔ پاننگے کہ دا کودک آ چنا برمش و اونا لمہ نا قصور انت ئس؟ سوج دادے کہ دا وڑ انا بندغ آتا ہرافک کشت و خون اٹ کل آن مونی ءُ، اوفتے لیسن آتے ہراتم کینسل کننگک؟

( آن لائن)