قومی اسمبلی نا دیوان ءِ بیرہ 50 باسک اٹ چلیفنگ نا سلاہ
اسلام آباد : حکومت و اپوزیشن باسک آک قومی اسمبلی نا دیوان نا کارروائی ءِ جوانی اٹ چلیفنگ آ اسیجائی ٹِک آتیا امنا کرینو۔ حکومت اپوزیشن نا منہ سلاہ سوج اسے امنا کرسا دیوان نا ایجنڈا ٹی اوار کننگ نا باور کرفے۔ حکومت و اپوزیشن نا نیام اٹ قومی اسمبلی نا دیوان ءِ 12 جون اسکان اسہ دے انا وقفہ ٹی چلیفنگ آ امنا کننگا، اپوزیشن راہشون نا کنڈ آن چست کروک 5 ایشو آ شرہ نا بنا اینو مریک۔ ایوان اٹی ایون ملخ و کراچی جہاز شکست آ ہم شرہ کننگک۔ اپوزیشن نا اسہ باسک اسے آن پد حکومتی باسک اس تران کیک۔ قومی اسمبلی دیوان اٹی باسک آتے کورونا رکھی گام گیج نا رد اٹ لابی تیٹی اِرغ تفننگ آ ہم امنا کننگا۔ سرجم حوال آتا رد اٹ اسپیکر قومی اسمبلی اسد قیصر نا کماشی ٹی اونا چیمبر اٹی دیوان اس مس، ہراٹی مسلم لیگ (ن)، پیپلز پارٹی و ایلو اپوزیشن جماعت آتتون اوار حکومتی باسک آک بشخ ہلکر، دیوان اٹی وزیر خارجہ شاہ محمود قریشی، بابر اعوان، پرویز خٹک، خالد مگسی، ڈپٹی اسپیکر قاسم سوری، راجہ پرویز اشرف، نوید قمر، مولانا اسد، علی محمد خان، رانا ثنا اللہ، سردار ایاز صادق و خواجہ آصف تون اوار ایلو اسمبلی باسک آک ساڑی ئسر۔ دیوان اٹی کورونا وائرس نا ودوک آ کیس آتیا گڑتی نا درشانی کننگا، دا وخت آ قومی اسمبلی نا 14 انا کورونا وائرس نا رپورٹ مثبت بننگ آ ہم گڑتی نا درشانی کننگا۔ اسپیکر قومی اسمبلی اسد قیصر بجٹ دیوان ءِ چلیفنگ نا بابت حکومت و اپوزیشن باسک آتا است ءِ ہلک۔ اسپیکر اسد قیصر پارے کہ ای دا ناجوڑی آن گدرینگانٹ، کنا مچ آ اُرا ڈکھیائی ءِ خنانے۔ دیوان نا وخت آ باسک، ملازم و صحافی تے ایس او پی تیا عمل کروئی تمک۔ دا وخت آ وزیر خارجہ شاہ محمود قریشی پارے کہ بروک آ دیک سخت مننگ کیرہ، کورونا نا تالانی ترندی اٹ مننگ ءِ، داسہ حالیت آک مست آنبار سلتنو، اپوزیشن باسک نوید قمر اسپیکر اسد قیصر ءِ سلاہ تس کہ بجٹ ہرازدے پیش کننگے، او دے آ ایوان اٹی بیرہ 50 باسک ساڑی مریر۔
( آن لائن)