بلوچستان، انسٹی ٹیوٹ آف پبلک ہیلتھ ءِ کورونا نا ٹریٹمنٹ نا تیاری تا پارت

کوئٹہ: وزیراعلیٰ بلوچستان جام کمال خان نا کماشی ٹی اڈ ہلوک بڑزکو کہولی دیوان اٹی covid-19 نا بابت و وائرس نا تالانی و اونا زہم انا جاچ ءِ ہلسا انسٹی ٹیوٹ آف پبلک ہیلتھ (آئی پی ایچ) ءِ پرائمری و سیکنڈری کہول آ کووڈ 19 نا ٹریٹمنٹ و پروٹوکول کن سنبرینگ نا پارت کننگا۔ دیوان اٹی پارلیمانی سیکرٹری جانجوڑی ڈاکٹر ربابہ بلیدی، ایڈیشنل چیف سیکرٹری داخلہ، سیکرٹری جانجوڑی، سیکرٹری خرانہ، سیکرٹری گوازی و انچارج بی سی اوسی، ایڈیشنل آئی جی پولیس، ڈی جی جانجوڑی، ڈی جی فوڈ، ڈی جی کشت و کشار، ڈی جی تعلقات عامہ، آئی جی پولیس طب و پبلک ہیلتھ نا بشخ انا چاہندار آتتون اوار تعلقدار کمامدار آک ساڑی ئسر۔ دیوان اٹی ساڑی طب انا چاہندار آک پٹ و پول، ریسرچ نا رد اٹ کورونا وائرس نا رویہ، تالانی و زہم انا بابت بریفنگ ترسا پاریر کہ بروک آ مسہ تُو اٹی خاص وڑ اٹ ستمبر 2020ءوائرس نا تالانی و زہم انا بابت اسُل حساس مننگ کیک، بلوچستان اٹی ہندی کہول آ تالان مروک آ وائرس نا رویہ و زہم ایول صبہ غاتیان جتا ءِ۔ صوبہ ٹی وائرس آن زہمی بندغ آتا تناسب زیات ءِ، ولے ناجوڑ آتا حالیت گچین و مرک آتا تناسب ہم کم ءِ۔ وخت اس کہ داتم اسکان نا ریسرچ نا رد اٹ مخلوق ءِ کورونا وائرس تون زند تدیفوئی تمک، ولے رکھی گام گیج آتتون اوار دانا تالانی و زہم ءِ کم کننگ مریک۔ دیوان آن تران کرسا وزیراعلیٰ پارے کہ کورونا وائرس نا رد اٹ پرائمری جانجوڑی نا نظام ءِ گچین کننگ کن بروک آ مالی سال انا بجٹ اٹی جانجوڑی نا بشخ انا شونداری ءِ اولیت تننگک۔ وزیراعلیٰ پارے کہ کورونا وائرس آن جانجوڑی نا بشخ انا نزوریک مون آ بریرہ۔ ہرافتے گچین کینہ۔ کورونا وائرس تون زند تدیفوئی ءِ، ولے داسہ دا الس آٹے کہ او رکھی گام گیج کیر و تینے بچفر۔ اگہ الس رکھی گام گیج آتیا عمل کرے تو وائرس نا زہم ءِ شیف شاغنگ مریک۔

(خ ن)