اوغان طالبان تا کنڈ آن 33 باسکی کابینہ نا پڑو

کابل : اوغان طالبان تا کنڈ آن اوغانستان نا 33 باسک آ تالان کابینہ نا پڑو ءِ کننگانے، ہراٹی ملا احسن اخوند ءِ عبوری وزیر اعظم پن کننگانے، وخت اس کہ ملا عبدالغنی برادر نائب وزیراعظم مریک۔ کابل اٹی طالبان تا ترجمان ذبیح اللہ مجاہد پریس کانفرنس اسے ٹی اوغانستان نا پوسکن آ حکومت نا جوڑ کننگ نا پڑو ءِ کرسا پارے کہ پوسکن آ اوغان حکومت نا سروک ملا محمد احسن اخوند ءِ، ہرادے عبوری وزیر اعظم پن کننگانے، قطر اٹی طالبان تا سیاسی دفتر نا سروک ملاعبدالغنی برادر نائب وزیر اعظم و حکومتی سروک نا کمکار مریک۔ داکان بیدس حقانی نیٹ ورک نا سروک سراج حقانی ءِ وزیر داخلہ وخت اس کہ اسد الدین حقانی ءِ نائب وزیر داخلہ پن کننگانے۔ طالبان تا شریک بانی ملا عمر نا مار و طالبان تا ملٹری کمیشن نا سروک ملا محمد یعقوب ءِ اوغانستان نا وزیر دفاع وخت اس کہ ملا فضل اخوند ءِ آرمی چیف تعینات کننگانے، ملا عبدالحق واثق اودیم ایجنسی نیشنل ڈائریکٹوریٹ آف سیکیورٹی (این ڈی ایس) نا سروک مریک۔ طالبان تا حکومت اٹی ملا امیر خان متقی ءِ وزیر خارجہ وخت اس کہ قطر اٹی طالبان تا سیاسی دفتر نا نائب شیر محمد عباس ستانکزئی ءِ نائب وزیر خارجہ جوڑ کننگانے۔ ہدایت اللہ بدری وزیر خزانہ مرو۔ شیخ خالد ءِ دعوت و ارشاد، ملا ہدایت اللہ ءِ ماحولیات، وزیر تعلیم شیخ اللہ منیر ءِ پن کننگانے۔ و عدالتی باندات آتے مولوی عبدالحکیم ہرک۔ طالبانک مولوی عبدالحکیم ءِ عدالت آتا سروک پن کرینو، وخت اس کہ خلیل الرحمان حقانی وزیر پردیسی مریک۔ ذبیح اللہ مجاہد پارے کہ ملا خیراللہ خیرخوا حوالکاری وزیر مریک۔ و قاری دین محمد حنیف وزیر کان کنی ءِ۔ طالبان ترجمان تینا پوسکن آ حکومت اٹی تننگوک عہدہ غاتا پڑو ءِ کرسا 33 باسک آ تالان کابینہ ٹی اوار پن تا پڑو ءِ کرے۔ او پارے کہ ہرا وزیر تا پن تے پڑو کننگانے، او عبوری وڑ اٹ کاریم کیک، و داٹی داکان پد بدلی ہم اتنگ مریک۔ او پارے کہ پنجشیر اٹی ہچ ءُ جنگ اس اف، و ملک انا ہر بشخ ننا دوٹی ءِ۔ کل تپہ غاتے ساڑی کابینہ ٹی نمائندگی تننگانے، او پارے کہ اوغانستان اٹی منشا بیرہ اوغان تا چلینگک، و اینو آن پد کس ہم اوغانستان اٹی نیام تمنگ کپک۔ بھاز آ ملک آتتون رابطہ مسنے و کیہی ملک آتا محکمہ خارجہ غاتا نمائندہ غاک اوغانستان ان دورہ ءِ کرینو۔ طالبان ترجمان پارے کہ اوغانستان اٹی کس ءِ نیام تمنگ نا موکل تفنہ۔

(آن لائن)