انویسٹ پاک پورٹل نا بناغان ریٹیل زرکارآتیکن آسراتی نا سوب مریک، محمد اورنگزیب

بنجائی وزیر خزانہ و بنگ سینیٹر محمد اورنگزیب پارینے کہ زرگزرانی جوانی و پوسکن کاری نا عمل اٹی ٹیکنالوجی نا مونی دننگ و زرکاری نا کمک اٹ وڑ پہ وڑ جوڑ کننگ بنداوی اہمیت تخک، انویسٹ پاک پورٹل نا بنا غان ریٹیل زرکارآتیکن پین پوسکن و آسان زرکاری نا وارخواہی فراوان مریک۔ اوداہیت ءِ دوشنبے نادے آ کراچی ٹی اسٹیٹ بینک آف پاکستان نا انویسٹ پاک پورٹل نا بنائی دود آن تران کرسا کرے۔ وزیرخزانہ پورٹل نا بناءِ کننگ آ گورنر اسٹیٹ بینک و اونا مچ آ ٹیم ءِ مبارکبادی تس و پارے کہ دا گام ملک اٹی زرکاری نا اسہ پوسکن ءُ دور اسے نا بنا مریک۔ وزیرخزانہ پارے کہ داکان مست او راست پروگرام نا بنا نا وخت آ ہم اسٹیٹ بینک آ بسوسس، اینو راست پاکستان نا ڈیجیٹل مالیاتی نظام نا غٹ آن سوگو تمبہ جوڑ مسنے راست پروگرام زرتس تا نظام اٹی انقلابی بدلی درستی راستی کرفینے، وزیراعظم تینٹ کیش لیس پاکستان گام انا کماشی ءِ کننگ ءِ۔ اوداہیت آ است جمی نا درشانی ءِ کرے کہ راست داسہ اسہ وتواجہ گورننس پنجر و گچین آپریٹنگ ماڈل اسے نا رداٹ کاریم کننگ ءِ۔ اوپارے کہ زرگزرانی اصلاحات و پوسکنوڑ نا عمل اٹی ٹیکنالوجی نا مونی دننگ و زرکاری نا وڑ وڈول ءِ وڑ پہ وڑ جوڑ کننگ بنداوی باندات آک ءُ دا رد اٹ پرائیویٹ بشخ انا کمک اٹ جاز کیش نا کمک اٹ کم آن کم پنچ ہزار روپئی آن حکومتی ٹریژری بل آتیٹی زرکاری نا آسراتی درستی راستی کرفنگا، ہرانا سوب آن داتم اسکان اسہ ہزار آن زیات پوسکن زرکار دا نظام آن فائدہ ہرفینو۔ اوپارے کہ انویسٹ پاک پورٹل نا بناغان ریٹیل زرکارآتیکن پین پوسکن و آسان زرکاری نا وارخواہی فراوان مریک۔ وزیرخزانہ پارے کہ تدوک آ ہژدہ تُو اٹی پاکستان اسٹاک مارکیٹ اٹی پوسکن آ زرکارآتا نمان کچ اوار مسنے، ہرافتے ٹی ورنا، خاص وڑ اٹ جنریشن زی نا بھلو بشخ اس اوار ءِ۔ اواومیت درشان کرے کہ اسٹیٹ بینک انا دا پوسکن آ گام پین ورناتے زرکاری نا کنڈآ اتنگ اٹ اہم کڑد ادا کیک۔ وزیرخزانہ پارے کہ زرکاری و مالی وسیلہ غاتے وڑ پہ وڑ جوڑ کننگ وخت انا اہم گرج ءِ۔ حکومت نا کوشست ءِ کہ مالیاتی گرج آتیکن بیرہ بینک ومالیاتی ادارہ غاتیا سیبو کننگ نا جاگہ غا انفرادی و ریٹیل زرکاری ءِ ہم مونی دننگے تانکہ زرکاری نا دنگ پین گیشتر مرے۔ وزیرخزانہ داہیت آ زور شاغا کہ انویسٹ پاک پورٹل کون آ گام گیج آتا سرسہبی کن صارف آتا سلاہ و اوفتا آزموندہ غاتے خاص اہمیت تننگ المی ءِ، انتئے کہ سوگو پت، شفافیت و ادارہ ئی شرف انا مونی دننگ ہندا دروشم اٹ مننگ کیک۔