شفاف و ٹیکنالوجی تون ہم گرنچ عدالتی نظام اولیت آتیٹی اوار ءِ،چیف جسٹس یحییٰ آفریدی

چیف جسٹس آف پاکستان جسٹس یحییٰ آفریدی پارینے کہ عدلیہ نا اصلاحاتی ایجنڈا ہندن ءُ نظام انصاف اسے نا ٹہیفنگ ءِ ہرا الس دوست، شفاف و پوسکن ٹیکنالوجی ہمگرنچ و گچین مرے تانکہ الس ءِ وخت آ و آسان انصاف نا فراوانی ءِ پک کننگ مرے و عدلیہ غا السی پت پین سوگو مرے۔ اوداہیت ءِ دوشنبے نادے آ سپریم کورٹ آف پاکستان اٹ حکومت پاکستان نا ”یوتھ کی اڑان“ پروگرام نا رداٹ ”اڑان اوورسیز پاکستانیز سمر اسکالرز پروگرام 2026“ نا ڈل اتون اوڑدہی ٹی کرے۔ داپروگرام نا مسخت پیشن ملک رہینگوک پاکستانی ورناتے پاکستان نا آئینی ادارہ، نظام حکمرانی، قومی پالیسی سازی و شونداری اولیت آتیان معلومدار کننگ ءِ۔ چیف جسٹس یحییٰ آفریدی ڈل ءِ پاکستان نا عدالتی نظام نا پنجر آن معلومدار کرسا پارے کہ ضلعی عدلیہ انصاف نا فراوانی نا بنداوی تمبہ ءِ و الس نا بھلو کچ اسے دراست انصاف فراوان کیک۔ اونیشنل جوڈیشل (پالیسی میکنگ) کمیٹی (این جے پی ایم سی) نا کڑد ءِ ہم مون آ تخا و پارے کہ دا فورم مچ آملک اٹی عدالتی اصلاحات و انصاف نا بشخ اٹی ادارہ ئی ہم گرنچی ءِ مون آ دننگ ءِ۔ چیف جسٹس عدلیہ نا برجا اصلاحات گام گیج آتا ذکر ءِ کرسا پارے کہ ڈیجیٹل کورٹ سروسز، نیشنل جوڈیشل اینالیٹکس ڈیش بورڈ، پبلک فیسیلیٹیشن سینٹر، اوورسیز لٹیگنٹس فیسیلیٹیشن سیل، ہیلپ لائن 1818 و ایلو آسراتی تا کمک اٹ عدالتی خذمت آتے زیات گچین، شفاف و الس دوست جوڑ کننگ انگ ءِ۔ اوپارے کہ عدلیہ جینڈر ریسپانسیو جسٹس انیشی ایٹیو (2026-27)نا کمک اٹ زالبول و ایلو نزور تپہ غاتے انصاف اسکان بریبر رسینگ فراوان کننگ کن ہم گام گیج کننگ ءِ وخت اس کہ ایکسیس ٹو جسٹس ڈویلپمنٹ فنڈ انا کمک اٹ عدالتی انفراسٹرکچر، ڈیجیٹل رابطہ، قابل تجدید توانائی و عدالتی کاریم نا کچ اٹی گچینی نا ڈٹ آتیاکاریم برجاءِ۔ اوکان پد چیف جسٹس یحییٰ آفریدی اوورسیز پاکستانی ورناتتون سوج و ورندی نا نشست اٹی ہم بشخ ہلک ہراٹی آئینی حکمرانی، عدالتی اصلاحات و پاکستان نا نظام انصاف نا آخبت نا بابت چندی باندات آتیا گپ وتران کننگا۔