پارلیمنٹ نا اسیجائی دیوان، سویڈن واقعہ غا مذمتی قرارداد منظور

اسلام آباد : پارلیمنٹ نا اسیجائی دیوان اٹ سویڈن اٹ قرآن پاک نا بے حرمتی نابرخلاف مذمتی قرارداد امنائی اٹ منظور کننگا‘ دا قرار داد ءِ بنجائی پارلیمانی امور مرتضی جاوید عباسی ایوان اٹ پیش کرے ہراڑا کل پارلیمانی جماعت آتا بنجائی راہشون تا دستخط آک ءُ و دادے سلابت آن پد ایوان اٹ پیش کننگا ہرانا پارلیمنٹ امنائی اٹ منظوری ءِ تس‘ اوکان گڈ پارلیمنٹ نا اسیجائی دیوان ءِ 25جولائی نا بیگہ نا پنچ بجہ اسکان پد بٹنگا‘ داکان مست سویڈن اٹ قرآن پاک نا بے حرمتی نا برخلاف تحریک ءِ شرہ کن بنجائی وزیر انسانی حق ریاض حسین پیرزادہ پیش کرے و وزیراعظم شہبازشریف شرہ نابناءِ کریسس‘ شرہ ٹی اپوزیشن لیڈر راجہ ریاض، مولانا اسعد محمود، احسن اقبال، سینیٹر شہزاد وسیم، یوسف رضا گیلانی، رضا ربانی، سینیٹر کامران مرتضی وپارلیمنٹ ناایلو باسک آک تینا خیال آتادرشانی ءِ کریر۔ تحریک انصاف نا سینیٹر آک ہم دیوان اٹ بشخ ہلکر‘ قرار داد اٹ پاننگانے کہ دا ایوان سویڈن اٹ قرآن پاک نا بے حرمتی نا واقعہ نا سخت انگا لوز آتے ٹی مذمت ءِ کیک و دانا زموار ملعون نا برخلاف سخت کارروائی کننگ نا خواست ہم کیک۔قرارداد اٹ مستی پاننگانے کہ جہانی برادری بین المذاہب ہم آہنگی و اسلامو فوبیا نا بابت خصوصی گام گیج کے۔اسلامو فوبیا نا برخلاف ہم ہمو وڑ انا گام گیج کننگے ہراوڑ ایلو مذہب آتا برخلاف ہیت کننگ آ کننگک۔ دا ایوان تعلقدار جہانی ادارہ و ریاست آتیا ہم زور شاغک کہ او قرآن پاک نا بے حرمتی ءِ توننگ کن دانا زموار ڈوہدار تے سزا ایتر‘ داڑتون اوار مذہب آتا مقدس کتاب، شخصیت و مذہبی عبادت گاہ و منوک آتا بے حرمتی ءِ ہم توننگے۔ دا ایوان قرآن پاک نا بے حرمتی آ او آئی سی نا دیوان ءِ بٹنگ انگ نا خیرمقدم ءِ کیک ہرا دا باندات آ سلاہ ترتیب تس و اسلامو فوبیا نا چٹفنگ کن جم حکمت عملی آ زور شاغا‘ دا ایوان دا عزم کیک کہ جہانی برادری بین المذاہب ہم آہنگی ءِ پک کننگ کن گام گیج کے تاکہ آخبت اٹ داوڑ انا واقعہ غاک مفس۔ دا قرارداد ءِ اقوام متحدہ، او آئی سی، یورپی یونین وایلو ملک و جہانی تنظیم تیا راہی کننگک و اوفتیا زور شاغنگ کہ او مقدس کتاب و شخصیت آتا گستاخی و بے حرمتی ءِ توننگ کن عملی وڑ اٹ گام گیج کیر وخت اس کہ او آئی سی نا کمک اٹ دا وڑانا واقعہ غاتے توننگ کن پارلیمنٹ ناباسک آک اسیجا کوشست کننگ آ زور شاغار۔

(آن لائن)