مچ آ دنیا ءِ پانہ کہ قرآن پاک نا بے شرفی ءِ سگپنہ، شہبا زشریف

تورغر: وزیراعظم محمد شہباز شریف پارینے وزیراعظم پارے کہ نن اسہ خُدا، اسہ نبی و اسہ قرآن اسے نا منوک اُن۔ مچ آ ملت اسلامیہ ٹی قرآن مجید نا بے شرفی آ خار تالان ءِ۔ سویڈن اٹی قرآن پاک نا بے شرفی آ مچ آ قوم ڈکھیا ءِ۔ اونا برخلاف برانز کننگ مسلم امہ نا حق ءِ۔ مچ آ دنیا ءِ پانہ کہ قرآن پاک نا بے شرفی ءِ سگپنہ، نن پارلیمان نا اسیجائی دیوان اس بٹنگانن تانکہ دنیا ءِ دا ناپاک حرکت آ تیان جوزہ غاتیان معلومدار کننگ مرے و دا کلہو ءِ تننگ مرے کہ داوڑنا اسہ حرکت اسے ہم سگنگ پننگک و مچ آ ملت اسلامیہ دانا برخلاف سوگو ءُ دیوال اسے۔ وزیراعظم محمد شہباز شریف پگہ (جمعہ نادے آ) قرآن کریم نا ناموس کن مچ آ ملک برانز نا خواست کرسا پارینے کہ ہر پاکستانی قرآن کریم نا تقدس نا بیرک ءِ ہرفسا اُراتیان پیش تمر و برانز اٹ شریک مریر۔ وزیراعظم پنچ شنبے نادے آ تینا ٹویٹ اٹی پارے کہ پارلیمنٹ نا اسیجائی دیوان قوم انا احساس و جوزہ غاتا پبی ترجمان ءِ کرسا قرآن کریم نا تقدس کن تینا پکا عزم انا درشانی ءِ کیک و سویڈن تون اوار مچ آ دنیا غا زور شاغک کہ اسلام تون اوار غٹ مذہب، مقدس ہستی و عقیدہ غاتا شرف ءِ کننگے۔ ناموس قرآن ننا ایمان نا بشخ ءِ۔ سویڈن تون اوار مچ آدنیا ٹی اسہ جاگہ اس ہم قرآن پاک نا بے شرفی ءِ اسہ مسلمان اس ہم سگپک۔ وزیراعظم پارے کہ دنیا نا غٹ امن پسند، مہذب اقوام و جہانی ادارہ غاک سوا ارب مسلمان تا است ءِ ڈکھیاکننگ، اوفتے کن مقدس و محترم شعائر، علامات آتا برخلاف خار تالان کننگ، اسلاموفوبیا نا واقعہ غاتا توننگ اٹ کڑد ادا کیر۔ دنیا ءِ شیطان صفت آتا دوٹی تننگ جہانی امن کن خطرہ اسے۔ دنیا ءِ بیامنی، خار و بیچیٹی نا جہنم اٹ بِٹنگ آن توروئی مریک۔ وزیراعظم پارے کہ ہندا کلہو ءِ تننگ کن پگہ (جمعہ نادے 7 جولائی) آ قرآن کریم نا ناموس کن مچ آ ملک برانز ہم مریک۔ ریلی کشنگک۔ ہرپاکستانی قرآن کریم نا تقدس نا بیرک ءِ ہرفسا پگہ تینا اُراتیان پیش تمر و برانز اٹ بشخ ہلیر۔

(اے پی پی)