بیست و پنچ اپریل آ کمیشن نا رپورٹ نا بننگ آ پین کارروائی مریک، عمران خان

اسلام آباد(اے پی پی/آن لائن) وزیراعظم عمران خان اسہ وار ولدا پارینے کہ 25 اپریل آ کمیشن نا رپورٹ نا بننگ آ پین کارروائی مریک، نت بورہ تنکی نا ہرکس کہ زموار گوندنگا کانود نا رد اٹ کارروائی کننگک، وزیراعظم نا کماشی ٹی بنجائی کابینہ نا دیوان تدوک آ دے مس۔ ہراٹی 9 ٹِک آ تالان ایجنڈا غا سجفنگا۔ دیوان اٹی کورونا وائرس نا پوسکن آ حالیت آ وزیر اعظم ءِ بریفنگ تننگا۔ وزیراعظم نا کماشی ٹی مروک دیوان اٹی انرجی کمیٹی نا فیصلہ غاتیا ہم سرجم ہیت و گپ مس۔ نادرا و انٹرنیشنل آرگنائزیشن آف مائیگرینٹس نا نیام اٹ معاہدہ و پاکستان نا کم شوندار علاقہ غاتیٹی انٹرنیٹ سروس بنا کننگ نامنظوری آ ہم سجفنگا۔ ممنوعہ و غیر ممنوعہ سلہ نا لیسن تا جاری کننگ نا بابت باندات آتیا ہم سجفنگا۔ جنرل پاور پرچیزنگ ایجنسی نا سی ای او نا تقرری آ ہم ہیت و گپ مس۔ دیوان اٹی بورہ و نُت انا تنکی نا انکوائری رپورٹ، ساڑی سیاسی حالیت و ملکی باندات آتیا ہم ہیت و گپ مس۔ عمران خان زُوت آتیٹ نا گام گیج آتا بابت کاریمہ نا باسک آتے پت اٹ ہلک۔ او پارے کہ کنا پارت آ انکوائری کمیٹی نا رپورٹ جاری کننگا۔ الس تون رپورٹ آتے پبلک کننگ نا قول کریسٹ۔ بنجائی کابینہ ءِ ٹائیگر فورس نا پوسکن آ رپورٹ ہم پیش کننگا۔ بنجائی کابینہ ءِ وزیراعظم کوروناریلیف ٹائیگر فورس انا بابت تازہ انگا رپورٹ پیش کرسا پاننگانے کہ فورس اٹی رجسٹرڈ ورناتاکچ 8لکھ انا خڑک سرمسنے۔ وزیراعظم عمران خان رپورٹ آ است جمی نا درشانی ءِ کرسا کوروناریلیف ٹائیگر فورس ءِ صوبائی کہول آ دمدستی وڑاٹ متحرک کننگ نا پارت کرینے۔