ڈاکٹر آتا ریلی آ پولیس نا لٹکاری، کیہیک دزگیر، بلوچستان اپوزیشن نا مذمت

کوئٹہ ٹی ینگ ڈاکٹر پیرا میڈیکل اسٹاف ءِ رکھی کٹ رسینگ پننگ آ برانز کریر،و  ریلی اس کشسا وزیر اعلیٰ نا اُرا نا کنڈ آ مون کریر۔ برانزیک سول ہسپتال آن مارچ کرسا وزیراعلیٰ سیکریٹریٹ آ سر مننگ آ ئسر کہ دا وخت آ پولیس ڈاکٹر و طبی کارندہ غاتیا لٹکاری کرے و کیہی ڈاکٹر آتے و طبی کارندہ غاتے دزگیر کرے۔ نجی ٹی وی نا رد اٹ ایس ایس پی اپریشنز پارے کہ ڈاکٹر و طبی کارندہ غاتا باسک آتے دفعہ 144 نا خلاف ورزی آ دزگیر کننگا، ہرافتے جتا جتا تھانہ غاتیا گدریفنگانے۔

ایلو کنڈ آ ینگ ڈاکٹر آتا پاننگ ءِ کہ اوفتے ہسپتال آتیٹی رکھی کٹ آک دوئی افس، ہرانا سوب آن اوفتا زند ءِ گڑتیک پلویڑ کرینو۔ اوفک پاریر کہ کیہی ڈاکٹر آتے داسہ ہم کورونا مسنے۔ و دا ویل ودسا ہننگ اٹی ءِ۔   ینگ ڈاکٹر آتا پاننگ ئس کہ ہسپتال اٹ ایہن ہم ننے کہوئی ءِ گڑا داڑے حکومتی زوراکی آن انتئے کسپن۔ اوفک پاریر کہ تانکہ رکھی گام گیج آک پورو مفسہ ڈاکٹر آک تینا زمواری تے پورو کننگ کپسہ۔

وخت اس کہ اپوزیشن جماعت آک ڈاکٹر آتیا لٹکاری نا مذمت ءِ کرسا پارینو کہ مچ آ ملک اٹ ڈاکٹر آتے گارڈ آف آنر تننگا، بلوچستان اٹی ہندافتے لٹ تننگا۔ جمعیت علماءاسلام نا راہشون وصوبائی اسمبلی اٹی اپوزیشن لیڈر ملک سکندر ایڈووکیٹ پارے کہ کورونا دا وخت آ جہانی دین اسے نا دروشم ءِ دوئی کرینے، مچ آ دنیا ٹی ڈاکٹر آتا سلاہ ءِ اہمیت تننگک، قوم انا مسیحا تے سلام پیش کننگا، وخت اس کہ ننا صوبہ ٹی ڈاکٹر آتون ہینڈ سینیٹائزر اسکان ہم اف۔ گدرینگوک آ دے تیٹی وزیر اعلیٰ تون اوڑدہی نا وخت آ دا بابت ہیت و گپ کریسن، صوبہ ٹی دا وخت آ 4ہزار ڈاکٹر ءُ۔ ڈاکٹر آتا جانجوڑی نا خیال ءِ تخنگ حکومت نا زمواری ءِ۔ او پارے کہ ننے لگپک کہ حکومت ءِ گچین سلاہ تروک ءُ کس اس مرو، اگہ دا وڑ مسکہ تو اینو نا واقعہ متوکہ۔ بلوچستان نیشنل پارٹی نا اسمبلی نا باسک و پبلک اکاﺅنٹس کمیٹی نا چیئرمین اختر حسین لانگو پارینے کہ صوبہ ٹی اسہ کنڈ آ قوم انا مسیحا تے گارد آف آنر پیش کننگا، وخت اس کہ ایلو کنڈ آ لٹ کاری کننگا، دا اسُل عجب ءُ ہیت اسے۔ مچ آ دنیا ٹی ڈاکٹر آتے دا وخت آ چند شرفمندی تننگ انگ ءُ، وخت اس کہ بلوچستان اٹی ڈاکٹر آتے الس نا زند ءِبچفنگ کن رکھی ازباب اسکان ہم تننگپک۔ حکومت نا دا رویہ بھاز غیر سنجیدہ ءِ۔ دا وڑ انا غیر سنجیدگی نا درشانی کننگ آن مست بایدے حکمرانک صوبہ نا الس و ڈٓکٹر آتیا رحم کرسا قوم انا مسیحا تے بنداوی آسراتی فراوان کرسا اوفتا است بڈی ءِ کروسر۔ و غٹ بندی ڈاکٹر آتے بایدے شرف ترسا یلہ کننگے۔ پشتونخوا ملی عوامی پارٹی نا راہشون و بلوچستان اسمبلی نا باسک پارلیمانی لیڈر نصر اللہ زیرے پارے کہ کورونا وائرس دنیا جہان اٹی دا وخت آ لکھ آ بندغ آتے زہمی کرینے، وخت اس کہ ہار آک زوال مسنو۔ و دا حالیت آتیٹی خدا غان پد ہندا ڈاکٹر آتا دُو آ مخلوق ہُرک، و داڑے صوبائی حکومت نا کنڈ آن اوفتیا لٹکاری کننگا، ہرا کہ سگ آن پیشن ءُ ہیت اسے۔