حکومت تون مذاکرات نا مسخت ملک اٹی سیاسی سوگوی اتنگ ئس،سلمان اکرم راجہ

اسلام آباد، پاکستان تحریک انصاف نا سیکرٹری جنرل سلمان اکرم راجہ پارینے کہ حکومت تون مذاکرات نا مسخت ملک اٹی سیاسی سوگوی اتنگ ئس، دہشت گردی نا چٹفنگ نا بابت خیبرپختونخوا نا سیاسی راہشون و قبائلی سرکڑدہ غاتا سلاہ تیا سجفنگ ناگرج ءِ‘ پی ٹی آئی نا لانگ مارچ برجا سلک۔ دو شنبے نا دے پریس کانفرنس آن تران کرسا سلمان اکرم راجہ پارے کہ حکومت و پی ٹی آئی نا نیام اٹی اِرا دیوان اٹ مذاکرات مسر، ولے اِرا اہم باندات آتیا ہیت مستی ہننگ کتو‘ او پارے کہ بانی پی ٹی آئی عمران خان تون اوڑدہی پارٹی نا اولیکو اولیت ءِ وخت اس کہ عمران خان نا خاہوت و تینا جند انا ڈاکٹر آتا اوڑتون اوڑدہی اولیکو حق ءِ‘ ہندا وڑ وکیل آتا اوڑدہی ہم بھاز اہم ءِ‘ سلمان اکرم راجہ پارے کہ ہرا پارٹی راہشونک تدوک آ مسہ سال آن عمران خان تون اوار ءُ، اوفتا ہم حق ءِ کہ او اوڑتون اوڑدہی کیر انتئے کہ بانی پی ٹی آئی قوم ءِ شون انا کسر نشان تس‘ او مذاکرات نا بے سہبی نا اسہ بھلو سوب اس خیبرپختونخوا اٹی دہشت گردی نا باندات ءِ گوندا‘ او پارے کہ خیبرپختونخوا ٹی امن جرگہ مس، ہراٹی کل سیاسی جماعت و قبائلی سرکڑدہ غاک بشخ ہلکر و قبائلی علاقہ غاتا ویل و اوفتا ایسری آ تینا سلاہ تے تسر‘ سلمان اکرم راجہ پارے کہ مر تولسا فیصلہ کننگ مننگ کپک، حالیت آتے گچین جوڑ کننگ کن ہندی بندغ و کل اسٹیک ہولڈر آتا سلابت المی ءِ‘ او پارے کہ حکومت تون مذاکرات اٹی دا ہیت ہم مسوسس کہ قبائلی علاقہ غاتتون تعلقدار فیصلہ غاتے امنائی سلاہ اٹ کننگک ولے کل انا سلاہ تے امنا کننگ متو۔ سلمان اکرم راجہ پارے کہ بانی پی ٹی آئی عمران خان نا تینا ڈاکٹر فیصل سلطان ءِ پینل نا بشخ جوڑ کننگ آ ہم امنا متو‘ ایہن تو دا اسہ اہم ءُ باندات اس ئس‘ او پارے کہ خیبرپختونخوا ٹی دہشت گردی و بانی پی ٹی آئی تون اونا خاہوت و تینا ڈاکٹر آتا اوڑدہی بھاز اہم سرحال ءُ۔