صوبہ ناحق آتا ہیت مس تو سیوت نابابت سجفنگ کینہ‘ سینیٹر منظور کاکڑ

کوئٹہ (آن لائن) بلوچستان عوامی پارٹی نا بنجائی سیکرٹری جنرل سینیٹر منظوراحمد کاکڑ پارینے کہ بلوچستان نا حق آتیا ہچ سمجھوتہ کننگپک‘ بنجا ٹی پی ٹی آئی ناسیوتی ان و داکان پد ہم سیوتی سلنہ‘ بلوچستان نا الس وونٹ ترسا ننے گچین کرینے داسہ ننا زمواری ءِ کہ حقی ءُ نمائندہ جوڑ مرسا صوبہ نا وسیلہ غاتیا واکداری نا حق اکن جہد کین‘ بلوچستان نا الس صوبہ نا اصل واکدار ءِ‘ نن بیرہ تینا حق آتے خواہنگ اُن زیات خواپننگ ان‘ اگہ صوبہ ناحق آتا ہیت مس تو سیوت نابابت سجفنگ کینہ‘ بلوچستان اٹ فیکٹری اف‘ صوبہ ناالس نا گزران کشت وکشار وپاک اوغان و پاک ایران سیم تیا واپاری آن مریک‘ شہید وطن میر سراج خان رئیسانی بھاز انسان دوست و مہر کروک ءُ شخصیت اس ئس۔ دا خیال آتا درشانی ءِ او دیکی بائی پاس آ جلسہ غان تران کرسا کرے۔ دا وخت آ میر فرید رئیسانی، ضیاء ترین اسک ہم تران کریر۔ تدوک آ دے ہراتم بلوچستان عوامی پارٹی نا بنجائی سیکرٹری جنرل سینیٹر منظور احمد کاکڑ کوئٹہ غاسر مس تو ایئر پورٹ آ بلوچستان عوامی پارٹی نا کارندہ غاک اودے بخیر کریر و میر جمال خان رئیسانی نا پارت آ قافلہ نا دروشم اٹ اودے ایئر پورٹ روڈ، عالمو چوک، کوئلہ پھاٹک، سمنگلی روڈ، زرغون روڈ و پشین اسٹاپ آن مرسا دیکی بائی پاس آ جلسہ نا ہندآ سر کننگا‘ قافلہ ٹی سَد آ گاڈی و موٹرسائیکل آک اوار ئسر۔ سینیٹر منظور احمد کاکڑ بلوچستان عوامی پارٹی ناکارندہ غاتا جم وجوش اٹ بخیر کننگ آ اوفتا منت ءِ ہرفسا پارے کہ کارندہ غاک دا پک کریر کہ بلوچستان عوامی پارٹی صوبہ ناالس نا حقی آ نمائندہ جماعت ءِ‘ پارٹی نا سرکڑدہ غاتا کماشی ٹی صوبہ ناحق آتیکن جہد برجا سلک۔ شہید وطن میر سراج خان رئیسانی ءِ خراج عقیدت پیش کینہ۔ جلسہ ٹی میر سراج رئیسانی شہید نا ایصال ثواب کن دعا ہم کننگا۔