زمی جمب: وزیر اعلیٰ بزنجو نا سردار اختر مینگل تون رابطہ

کوئٹہ: وزیراعلیٰ بلوچستان میر عبدالقدوس بزنجو، بی این پی نا سروک قومی اسمبلی نا باسک سردار اختر جان مینگل تون ٹیلفون آ رابطہ کرینے، ہراٹی ہڑتوم آ راہشونک خضدار نا چندی علاقہ غاتیٹی زمی جمب آن ودی مروک حالیت و کمکی سرجز آتا بابت ہیت و گپ کریر۔ وزیراعلیٰ میر بزنجو، سردار اختر جان مینگل ءِ حکومتی ادارہ غاتا کنڈ آن زہمی علاقہ غاتیٹی بنا کروک کمکی کارروائی تا بابت سرجم حوال تس۔ او پارے کہ پی ڈی ایم اے نا کنڈ آن زہمی علاقہ غاتیٹی کمکی گڑا راہی کننگانے، و ضلعی انتظامیہ ءِ زہمی تا ریسکیو و دمدستی کمک کن پارت جاری کننگانے۔ وزیراعلیٰ پارے کہ ضلع خضدار اٹی کل ادارہ غاتے ہائی الرٹ کرسا ایمرجنسی نافذ کننگانے۔ و زہمی تا کمک و بحالی نا بابت ہچ ءُ ڈیوالئی اس سگنگ پک۔ وزیراعلیٰ بزنجو باور کرفے کہ زہمی تا پبی کمک و نسخان تا ایسری کن گام گیج کننگک۔ بی این پی نا سروک کمکی سرجز آتیا است جمی نا درشانی کرسا اومیت درشان کرے کہ حکومت زہمی تا کمک و بحالی نا بابت تینا زمواری تے جوانی اٹ سر ایتک۔یات سلے کہ تدوک آ دے مروک زمی جمب آن خضدار نا کیہی علاقہ غاتیٹی، خاص وڑ اٹ آڑنجی ٹی زمی جمب آن بھلو نسخان مسنو، حکومت نا پاننگ ءِ کہ زہمی علاقہ غاتیٹی کمک راہی کننگانے۔

(خ ن)