حکومت مخالف سجفنگ آتا خدو سما تماسس کنے، عمران خان

اسلام آباد: مسکوہی وزیراعظم عمران خان دعویٰ کرینے کہ اودے حکومت مخالف سجفنگ نا ڈٹ انا تدوک آسال جولائی ٹی سما تماسس۔ خصوصی پوڈکاسٹ اٹ ہیت وگپ کرسا عمران خان پارے کہ اوغانستان اٹ خانہ جنگی نا گڑتیک ئسر ہندا سوب آن ای خواتوٹہ کہ مشکل وخت اٹ انٹیلی جنس چیف بدل مرے‘ دا ہیت آ دا تاثر تننگا کہ ای جنرل فیض ءِ آرمی چیف جوڑ کننگ خواوہ‘ اوپارے کہ کنے گدرینگوک آ باسنی ٹی کساس مسوسس کہ ہراتم امریکہ اوغانستان آن ہناتو ہموڑے خانی جنگی مننگ کیک ہرانا زہمک پاکستان آ ہم بننگ کیرہ و بسر ہم‘ ننا فوجی شہید مسر‘ ای خواہسٹہ کہ ہرا انٹیلی جنس چیف پنچ سال آن ءِ او مشکل وخت اٹ ہم ساڑی مرے۔ عمران خان پارے کہ ارٹمیکو کنے دا ہم سما تماسس کہ دا ن لیگ والاک ری انٹری کننگ اٹی ءُ ہراکہ داسہ کریر ہم‘ کنے تدوک آسال جولائی آن سما تمسا کرے کہ او حکومت ءِ بٹنگ نا پورو پلان جوڑ کرینو‘ ہندا سوب آن ای خواتوٹہ کہ تاکہ یخ ہنپ ننا انٹیلی جنس چیف بدل مف و دا ڈکوئی ءُ ہیت اس الو‘ ای تینا کابینہ ٹی پاش وڑ اٹ پاریٹ کہ ہراتم نمے آ وخت مشکل ءِ تو نم تینا انٹیلی جنس چیف ءِ بدل کپبو انتئے کہ ہندا حکومت نا خن وپن مریک۔ او پارے کہ داڑے داڑے تاثر چلینگا کہ ای جنرل فیض ءِ آرمی چیف جوڑ کننگ خواوہ‘ ای اینو اسکان میرٹ نابرخلاف اسہ فیصلہ اس ہم کتنٹ‘ ای دا سجفنگ ہم کپرہ کہ آرمی چیف نا باندات آ میرٹ آن چَپ فیصلہ اس کیو‘ ای خواوہ کہ کنافوج انا ادارہ سوگو مرے‘ دا گڑاتے تالان کننگا کہ عمران خان جنرل فیض ءِ تینا آرمی چیف جوڑ کننگ خواہک‘ ولے کنا ذہن اٹ دن ءُ ہچ ءُ ہیت اس الو۔ ہندا پوڈ کاسٹ اٹ عمران خان پارے کہ قوم ہموتم بھس مریک ہراتم چنکا دز آتے ہلنگے و بھلا دز آتے یلہ کننگے‘ جہانگیر ترین و علیم خان نا مسخت اقتدار اٹ برسا فائدہ ہرفنگ ئس‘ اوپارے کہ علیم خان کنے آ اومیت کریکہ کہ ای اونا ڈغار تے لیگل کرفو‘ علیم خان راوی آ 300 ایکڑ ڈغار ہلسا لیگل کرفنگ خواہسکہ‘ ہموکان علیم خان وکنا نیام اٹ مُری ودی مس۔ جہانگیر ترین نابابت ہیت وگپ کرسا عمران خان پارے کہ اونا ویل بورہ ناتنکی ئس ہراڑکن کمیشن ہم ٹہیفنگا‘ جہانگیر ترین ہمو بندغ آتتون اوار مس ہرا ملک انا کل آن بھلا داڑیل آک ئسر۔ شوگر مافیا غا انکوائری کننگاتو جہانگیر ترین تون اختلاف ودی مس۔ عمران خان پارے کہ جہانگیر ترین و علیم خان نا اقتدار اٹ بننگ نا مسخت فائدہ ہرفنگ ئس‘ ہڑتوم آک پارٹی نا سرسہبی کن بھاز خواری کریر ولے اوفتا آئیڈیلز ہمو الوس ہرا کنا ئسر‘ کنا برخلاف بھلا سازش ءِ پاکستان اٹ ساڑی میرجعفر و میرصادق کرفیر‘ کنا یقین ءِ کہ کنا ملک سوگو وآجو مرے و او کس نا مون آ کاٹم ءِ شیف کپک۔ او پارے کہ عدلیہ از خود نوٹس ہم ہلک و ننکان 12 بجہ غا عدالت آک ملنگار ولے منحرف باسک آتا برخلاف ہچ کارروائی کتو۔ عمران خان زور شاغا کہ داسہ ہر کس ءِ ٹکٹ تسٹ اوڑان سوغند ہلیوہ کہ اگہ کاروبار کروئی ءِ تو اقتدار اٹ بف‘ دا سرپند مفیرے کہ ای نما کاروبار ءِ غیرکانودی فائدہ رسیفوہ۔ اوپارے کہ بورہ کبین مس تو شوگر مافیا نا برخلاف کارروائی کننگ آ جہانگیر ترین تون اختلاف مس۔ علیم خان راوی ٹی 300 ایکڑ ڈغارہلک ہرافتے او کانودی کرفنگ خواہسکہ‘ اونا برخلاف نیب اٹ ہم کیس ئس‘ اوکنے آن ہمون خواہسکہ ہرا کاریم ءِ نواز شریف و زرداری کریرہ ای ہم ہمو کاریم ءِ کیو دُنکہ غلط کاریم ءِ روا کننگ‘دا سوب آن کنے آن اونااختلاف ودی مس۔

(مانیٹرنگ ڈیسک/ آن لائن)