راستکی تے مون آ تخسا زکوٰة نا پوسکن ءُ نظام اس ٹہیفوئی تمک، مفتی تقی عثمانی

اسلام آباد (آن لائن)پنی آ عالم دین و سپریم کورٹ نا ے شریعہ اپیل بینچ انا مسکوہی جج مفتی تقی عثمانی سلاہ سنے کہ راستکی تے مون آتخسا زکوٰة نا پوسکن ءُ نظام اس ٹہیفنگے۔ میڈیا رپورٹ نا رد اٹ سپریم کورٹ اٹ او سلاہ تس کہ اگہ زکوٰة نا نظام ءِ برجا تخوئی ءِ تو دانا اول سر جاچ ءِ ہلسا راستکی تے مون آ تخسا اوٹی بدلی کننگے‘ بایدے عبادت نا دا مقدس انگا وڑ زکوٰة وڈی خوری و بدانتظامی نا گواچی مف، حکومتی کہول آ زکوٰة ءِ سنبھالنگ کن بھاز سوگو و منظم ءُ نظام اسے ناگرج ءِ۔ ہرا دا وخت آ ساڑی اف۔ اگہ ساڑی نظام ءِ پوسکن ءُ نظام اسے ٹی بدل کننگ مفک تو دا خیال ءِ النگے کہ حکومت زکواة بشخنگ نا بست وبند کے۔ الس ءِ پورو بھروسہ اٹ براہِ راست تینٹ غریب آتے زکوٰة تننگ و است جم مننگ کن النگے کہ اوفتا زکوٰة حقدار آتسکان سر مسنے۔ مفتی تقی عثمانی دا ہیت آ است ہسونی نادرشانی ءِ کرے کہ الس زکواة نا نظام آ پت کپک و او حکومت ءِ زکوٰة تننگ آن تینے پد تورک و داڑکن یاتو روچہ غان مست بینک اکائونٹ آتے ٹی تخوک بھلا پیسہ غاتے کشک یا دا نشان ایتک کہ اوفتا ’فقہہ‘ دا گڑاتیا زکوٰة تننگ نا موکل تفک۔ یات سلے کہ سپریم کورٹ نے حکومت ناکنڈآن نوول کورونا وائرس نا توننگ کن کروک گام گیج آتیا ازخود نوٹس نا سماعت اٹ مفتی تقی عثمانی و اسلامی نظریاتی کونسل آن دا سلاہ خواہسوسس کہ انت زکوٰة نا یپسہ و بیت المال ءِ محکمہ نا ملازم آتا تنخواہ تے تننگ یا ہڑدے ئی خڑچ آتیکن کاریم اٹ اتنگ مریک۔