وائرس آن بچنگ نا اسٹ انگا کسر لاک ڈاﺅن ءِ‘کمشنر رخشان ڈویژن

چاغی (آن لائن) انجمن تاجران دالبندین نا ڈل کمشنررخشان ڈویژن سعید عمرانی تون اوڑدہی کرے‘ ڈل اٹ صدر حاجی آغاحسنی سرپرست اعلی حاجی صاحب خان محمدحسنی‘ جنرل سیکرٹری حاجی ٹکری نور احمد ساسولی و وائس چیئرمین حاجی حافظ اسماعیل گورگیج اوار ئسر۔ انجمن تاجران نا عہیدار آک کمشنر ءِ لاک ڈاﺅن نا وخت وپاس و دکاندار تا مشکل آتیان معلومدار کریر۔ کمشنر رخشان ڈویژن سعید عمرانی پارے کہ کورونا وائرس خطرناک ءُ ناجوڑی سے دا وائرس آن بچنگ نا اسٹ انگا کسر لاک ڈاﺅن ءِ ولے غریب انگا ملک آک سخت لاک ڈاﺅن ءِ سگنگ کپسہ‘ ملک انا زرگزران اٹ پوریاگر برادری نا بھلو کڑد اسے‘ پوریاگر تا مشکل آتا ننے سماءِ و اوفے ایسر کننگ نا ہر وڑ اٹ کوشست کینہ۔ او باور کرفے کہ زوت ٹائمنگ نا بابت رخشان ڈویژن نا کل ڈی سی تا دیوان بٹنگسا دا بارواٹ امنائی اٹ لائحہ عمل جوڑ کینہ۔ اوڑدہی ناوخت آ ڈی سی چاغی آغا شیرزمان و اسسٹنٹ کمشنر دالبندین جاوید ڈومکی ہم ساڑی ئس‘ ڈل سعید عمرانی ءِ رخشان ڈویژن نا کمشنر ناچارج ہلنگ آ مبارکبادی تس۔