کورونا کون آدَین آن بچنگ کن رکھی گام گیج آتیاعمل کروئی مریک‘ مولانا کمال الدین

پشین (آن لائن) جمعیت علماءاسلام نا صوبائی نائب امیرو قومی اسمبلی نا باسک مولانا کمال الدین پارینے کہ اسلام ننے رکھی گام گیج نا کسر ءِ ہرفنگ نا سبخ تسنے۔ ننے کورونا کون آدَین انا جہانی و ہلوک آ ناجوڑی آن بچنگ کن رکھی گام گیج آتیاعمل کروئی مریک‘ دا وخت آ لکھ آ بندغ آک دا ناجوڑی آن زہمی مسنو وخت اس کہ پنجا ہزار نا کچ بندغ دا ناجوڑی ناسوب آن زوال مسنو ہرانا بنداوی سوب دا ناجوڑی آن بے رکھی و طب انا اصول آتیا عمل کپننگ ءِ۔ دا خیال آتا درشانی ءِ او پریس کلب پشین اٹ میڈیا تون ہیت وگپ کرسا کرے۔او پارے کہ ہراتم چین اٹ دا چَین تالان مس اوکان گڈ دا ناجوڑی نا زہمک ایران آ سر مسر تو پاکستان ناداڑان زیات زہمی مننگ نا خلیس ارے انتئے کہ ننا ملک ہمسائے ملک آتا نیام اٹی ءِ‘ ننا الس دا ناجوڑی نا توننگ کن طب انا چاہندار آتا کنڈآن تروک پارت آتا وڑ اٹ رکھی گام گیج کرسا دا ناجوڑی ءِ توننگ کیک‘ اوپارے مچ آدنیا ٹی لاک ڈاﺅن ءِ ہرانا بنداوی سوب دادے کہ بندغ آتے تنیاءُ چاگڑد اسے ٹی رہیفسا دا ناجوڑی ءِ توننگ ءِ۔ اوپارے کہ قدرتی آفت آک انسانی زند اتون اوار انسان نا تخلیق تون گنڈوک ءُ‘ فطری وڑ اٹ ننے دا آفت آتون مون تننگ کن تیار مروئی مریک‘ مستین ہندا وڑ انا آفت آتیان کروڑ آ انساک زہمی مرسا زوال مسنو‘ اسلامی تاریخ اٹ ہم دا وڑ انا قدرتی آفت آتون مون تننگ کن رکھی گام گیج آتے تینائی کننگ نا زور شاغنگانے‘ الس انتظامیہ نا کنڈآن لاک ڈاﺅن نارد اٹ رکھی گام گیج آتیا عمل کرسا ضلعی کمامدار آتتون کمک کے۔