کوئٹہ‘لاک ڈاﺅن آن الس فریشان‘ یوٹیلٹی اسٹور تے ٹی نُت وبورہ نا تنکی ویل آتے ودفے

کوئٹہ (آن لائن) کوئٹہ ٹی لاک ڈاﺅن نا سوب آن مروک بے روزگاری نا سوب آن الس ءِ مشکل آک مون تروئی تمنگ ءُ‘ ایلو کنڈ آ یوٹیلٹی اسٹور اٹ نُت و بورہ نا چٹنگ آن بندغ آتا مشکل آک پین ودانو۔ اسٹور مالک آک پارینو کہ نُت و بورہ نا آرڈرتننگانے ولے داسکان کوئٹہ غاسر متنو۔ حوال نارد اٹ کوئٹہ ٹی لاک ڈاﺅن نا حالیت نا سوب آن ہراڑے واپاری ہندجات آتا بند مننگ آن الس ءِ مشکل آک مون تروئی تمنگ ءُ ہموڑے الس نا مشکل آک ہمووخت آ ودار ہراتم شار انا بھاز آ یوٹیلٹی اسٹور تے ٹی نت و بورہ نا تنکی ودی مس۔ شاریک پارینو کہ حکومت نا کنڈآن تو بھلو بھلو ریلیف تننگ نادعوی کننگ انگ ءِ ولے تو تیناجاگہ غا کوئٹہ شار انا بھاز آ یوٹیلٹی اسٹورتے ٹی نُت وبورہ ہم اف ہرانا سوب آن الس نا مشکل آک پین ودانو۔ او پاریر کہ لاک ڈاﺅن نا حالیت ناسوب آن حالیت آن مہالو آن خراب ءِ و ایکان یوٹیلٹی اسٹور تے ٹی بورہ و نُت انا تنکی ودی مسنے ہرانا سوب آن الس کبین نہاد آ ایلو دکان تیان نُت وبورہ ہلنگ آ بیوس ءِ۔