بلوچستان نا 35 ضلع ٹی ڈسٹرکٹ کونسل باسک آتا گچین کاری اینو مریک
Get real time updates directly on you device, subscribe now.
کوئٹہ : بلوچستان نا 35ضلع (کوئٹہ غان بیدس) نا ڈسٹرکٹ کونسل تا باسک آتا سوغند ہرفنگ و گچین کاریک اینو 6 جولائی2023 آمریرہ‘ کل بست وبند آک پورو ءُ‘ ڈسٹرکٹ کونسل نا 1266 باسک تینا سلاہ درشانی ءِ کیرہ۔ صوبائی الیکشن کمشنر بلوچستان شریف اللہ پارینے کہ الیکشن کمیشن آف پاکستان نا اعلامیہ نا رد اٹ بلوچستان نا 35 ضلع (کوئٹہ غان بیدس) نا ڈسٹرکٹ کونسل نا باسک آتا سوغند ہرفنگ و چیئرمین ووائس چیئرمین تا گچین کاریک 6 جولائی 2023 آ مریرہ‘ کل بست وبند آتے پورو کننگانے‘ بلوچستان نا 35 ضلع نا ضلع کونسل کن گچین مروک باسک آک سوغند ہرفرہ و اوکان گڈ چیئرمین و وائس چیئرمین کن وونٹ بٹسا اوفتے گچین کیرہ۔ پولنگ سہب انا 8 بجہ غان بیگہ نا چار بجہ اسکان برجا سلک۔ 35 ضلع ٹی 1266ڈسٹرکٹ کونسل نا باسک آک وونٹ ایترہ‘ کل باسک آتے پرمان کننگانے کہ ووٹنگ کن تینا اصلی شناختی کارڈ و الیکشن کمیشن آن جاری کروک کارڈ ءِ تین تون اتیر۔
(آن لائن)