غیر مناسب مواد آتے تینا چناتے خوانفنگ نا موکل تفنہ، رانا تنویر حسین

اسلام آباد: بنجائی وزیر تعلیم و کسبی تربیت رانا تنویر حسین پارینے کہ اولیول نا نصابی کتاب اٹی غیر مناسب مواد آتے تینا چناتے خوانفنگ نا موکل تفنہ، کیمبرج نا انتظامیہ ءِ دا چرجوئی ٹی چٹھی اس نوشتہ کننگ اُن، ننا مذہب و راج اٹ دا وڑنا تعلیمی مواد آتے مننگ پننگک۔ سے شنبے نادے آ سینیٹ اٹی سینیٹر محسن عزیز و فیصل سلیم الرحمان چکاری نوٹس نا ورندی ٹی او پارے کہ ہژدہ می ترمیم نا رداٹ تعلیم نا بشخ صوبہ غاتیا ہنانے، بنجائی حکومت نا دنگ بھاز محدود ءِ و دا بابت صوبہ غاتے ہم اولیول نا سوشیالوجی نا نصابی کتاب اٹی غیرمناسب مواد آتا بابت معلومدار کننگ اُن، کیمبرج نا تینا سسٹم اسے ولے ننا مذہب و راج اٹ تعلیمی نصاب اٹ غیرمناسب مواد آتے مننگ پننگک و نئے دانا موکل تننگ مریک۔ اوپارے کہ نن کیمبرج انتظامیہ ءِ چٹھی اس نوشتہ کرینن کہ پاکستان کن تینا نصاب آن غیر مناسب مواد آتے کشنگے۔ اوپارے کہ مسکوہی حکومت نا دور اٹی ہرا تعلیمی نصاب ءِ منظور کننگاسس اوڑا خیبرپختونخوا آن بیدس غٹ صوبہ غاتا اعتراض ئسک و ہمووخت انا تعلقدار بنجائی وزیر ہم داڑان متفق الوکہ، نن اسہ تُو اٹی غٹ صوبہ غاتا سلابت اٹ تعلیمی نصاب نا باندات آتے امنائی سلاہ اٹ طے کرین۔

(اے پی پی)