اسسٹنٹ کمشنر لونی فتح خان بنگلزئی نا دکی بازار نا دورہ

دکی، ڈپٹی کمشنر دکی فضل الرحمن کبدانی نا خصوصی پارت آ اسسٹنٹ کمشنر لونی فتح خان بنگلزئی دکی بازار نا دورہ ءِ کرے، ہراڑے او جتا دکان، بیکری، داش تا دکان، ہوٹل و ایلو کاروباری ہند آتا دورہ ءِ کرے‘ دورہ نا وخت آ ہڑدے ئی گرج انا گڑاتا نہاد، سرکاری نہادلڑ آ عملدرآمد، پرائس لسٹ انا ساڑی مننگ‘ و اودے نمان ہند اسے آ خلنگ‘ کنشت نا گڑاتا آب‘ وزن و کچ‘ سفائی و جانجوڑی نا اصول آتتون اوار ایلو بست وبند آتا جاچ ءِ ہلنگا‘ اسسٹنٹ کمشنر لونی فتح خان بنگلزئی دکاندار تے پارت کرے کہ الس ءِ ہڑدے ئی گرج انا گڑاتے سرکاری نہاد لڑ انا رِد اٹ فراوان کننگے و ہر وڑ اٹ پن کروک نہاد آتیان زیات ہلنگ‘ ناروا کٹیا کاری یا بے میعاد گڑاتا بہا کننگ آن بچنگے۔