پاک اوغان سیم آن پترینگ گیگ نا کوشست بے سہب، فتنۃ الخوارج نا 15 خوارج خلنگار،آئی ایس پی آر

راولپنڈی، سیکورٹی فورس آک ضلع قطبی وزیرستان نا مون مقابل پاک اوغان سیم آن پترینگ گیگ انا کوشست کروک بھارتی مخ تف فتنۃ الخوارج نا 15 خوارج ءِ دوزخی کریر۔ پنچ شنبے نادے آ پاک فوج انا شعبہ تعلقات عامہ (آئی ایس پی آر) آن جاری بیان نا رداٹ 31 اگست و یکم ستمبر نا نیامی نن سیکورٹی فورس آک ضلع قطبی وزیرستان نا مون مقابل پاک اوغان سیم آن پترینگ گیگ نا کوشست کروک بھارتی کاٹم خواجہی ٹی کاریم کروک فتنۃ الخوارج آن تعلقدارخوارج آتا اسہ ٹولی اسے نا ہن و بر ءِ خنار۔ سیکورٹی فورس آک کسبی چاہنداری و صبر و جیرت نا درشانی ءِ کرسا اوفتتون سرسہبی اٹ مون تسر۔ 36 گھنٹہ اسکان برجاسلوک بے کچ درست و چاہندار کارروائی نا وخت آ بھارتی کاٹم خواجہی ٹی کاریم کروک فتنہ الخوارج نا 15 خوارج ءِ دوزخی کننگا۔ کلیئرنس و سینیٹائزیشن آپریشن نا وخت آ خلنگوک خوارج آتیان بھلو کچ اسے ٹی سلہہ و منچر ہم دوئی مس ہراڑان ملک اٹ امن و سوگوی ءِ خراب کننگ نا خواہندار خوارج و اوفتا کمکارآتا پراگندہ عزم آک بے پڑدہ مسنو۔ پاک اوغان سیم آ پیش بروک دا واقعہ اسہ وار ولدا پاکستان نا دا آخبتی موقف ءِ پک کیک کہ اوغان طالبان حکومت تینا کاٹم خواجہی ٹی دہشت گرد تنظیم ءِ سیم آن ایپار دہشت گردی کن اوغان ڈغار نا کاریم اٹ اتنگ آن توننگ اٹ پورو وڑاٹ بے سہب مسنے۔ اوغان طالبان حکومت گچین سیمی بست وبند ءِ پک کننگ و تینا جہانی زمواری تے پورو کننگ اٹ پدریسہ بے سہب مسنے۔ آئی ایس پی آر پارینے کہ پاکستان نا سیکورٹی فورس آک ملکی سیم تا رکھ اکن سنبرینگوک ءُ۔ علاقہ ٹی ساڑی بھارتی کاٹم خواجہی ٹی کاریم کروک ایلو خوارج آتا چٹفنگ کن سینیٹائزیشن آپریشن برجاءِ۔ بنجائی ایپکس کمیٹی نیشنل ایکشن پلان نا منظوری آن عزمِ استحکام نا وژن نا رداٹ سیکورٹی فورس و کانود نافذ کروک ادارہ غاتا کنڈ آن برجا دہشت گردی تور مہم پورو ترندی اٹ برجاسلک تانکہ ملک آن درملکی کاٹم خواجہی و مخ تف دہشت گردی نا ناچوڑ ءِ پورو وڑاٹ چٹفنگ مرے۔صدرِ مملکت آصف علی زرداری قطبی وزیرستان اٹ پاک اوغان سیم آن پترینگ گیگ نا کوشست ءِ بے سہب کننگ آ سیکورٹی فورس آتے خراجِ تحسین پیش کرینے۔ پنچ شنبے نادے آ ایوانِ صدر نا پریس ونگ انا رداٹ صدرِ مملکت 15 بھارتی کاٹم خواجہی ٹی کاریم کروک فتنۃ الخوارج آتے دوزخی کننگ آ سیکورٹی فورس آتا کسبی چاہنداری و بہادری نا ستاءِ کرسا پارینے کہ وطنِ عزیز نا سیم تا دفاع و امن و سوگوی نا رکھ اکن سیکورٹی فورس آتا عزم ستاکڑزک۔ صدرِ مملکت پارے کہ پیشن نا کاٹم خواجہی ٹی کاریم کروک دہشت گرد آتے پاکستان اٹ بے ایمنی تالان کننگ نا موکل تننگپک۔وزیراعظم محمد شہباز شریف قطبی وزیرستان نا خُڑک پاک اوغان سیم آ فتنۃ الہندوستان آن تعلقدار ٓ خوارج آتا پترینگ گیگ نا کوشست ءِ بے سہب کننگ و 15 دہشت گرد ءِ دوزخی کننگ آ سیکورٹی فورس آتا افسرو ورناتے خراجِ تحسین پیش کرینے، پنچ شنبے نادے آپی ایم آفس نا میڈیا ونگ آن جاری بیان نا رداٹ وزیراعظم پارے کہ پاکستانی سیکورٹی فورس آک بھاز کسبی چاہنداری‘ صبر و جیرت نا درشانی ءِ کرسا فتنۃ الخوارج نا دہشت گرد آتا پراگندہ عزم آتے مش تیٹی اوار کریر۔ وزیراعظم پارے کہ ملک آن دہشت گردی نا ناچوڑ ءِ ماس کش کننگ اسکان سیکورٹی فورس آتا دہشت گردی تور انا ”عزمِ استحکام“ مہم پورو واک و عزم اٹ برجاسلک، مچ آ قوم ءِ تینا بہادر سلہہ بند فوج آ گمر ءِ ہرا ملکی سیم تا دفاع و وطن نا سلامتی کن جنگ تننگ اٹی ءِ۔