پاکستان، چین اٹی واپار و زرکاری نا مون آ دننگ اٹ اہم پیش رفت

اسلام آباد، چین نا شار گوانگ ژو ٹی پنچ می پاکستان انویسٹمنٹ اینڈ بزنس انوائرمنٹ ایکسچینج فورم 2026 اڈ ہلک، ہراٹی پاکستان و چین نا نیام اٹ ہڑتوم آ کنڈآتا واپار، زرکاری و کاروباری کمک نا مونی دننگ کن پوسکن آ وارخواہی تا جاچ ءِ ہلنگا۔ فورم نا وخت آپالیسی مذاکرات، زرکاری نا ڈٹ آتا پیشکش، صنعتی معاہدہ، بی ٹو بی اوڑدہی و پاکستانی گڑاتا نمائش نا بست وبند ءِ کننگا۔ الیکٹرک گاڑی، بیٹری مینوفیکچرنگ، تعمیراتی گڑا، فرنیچر، پائن نٹس و میڈیکل و بزنس ٹورازم نا بشخ آتیٹی پنچ مفاہمتی یادداشت آتیا دستخط ہم کننگا۔ فورم اٹ توانائی، ای کامرس، تعمیراتی گڑا، فرنیچر و فوڈ پروسیسنگ تون اوار چندی بشخ آتیٹی زرکاری نا وارخواہی تے تالان کننگا، وخت اس کہ سی پیک نا رداٹ صنعتی و انفراسٹرکچر نا کمک ءِ پین ودفنگ نا گمان تیاہم گپ و تران کننگا۔ پاکستان و چین نا نیام اٹ سفارتی تعلقداری تا 75 سال پورو مننگ نا وخت آ ہڑتوم آ ملک آتا نیام اٹ اقتصادی رابطہ غاتے پین سوگو کننگ نا عزم نا ہم درشانی ءِ کننگا۔ ودوک آ واپاری رابطہ، پوسکن زرکاری و کاروباری شریداری پاکستان و چین نا اقتصادی کمک ءِ پوسکن بشخ اس تننگ ءِ۔