بی این پی نا پہیہ جام ہڑتال، قومی شاہراہ تیا ٹریفک اسُل بند

کوئٹہ :  بلوچستان نیشنل پارٹی نا بنجائی اعلامیہ نا رد اٹ پارٹی نا بنجائی صدر سردار اختر جان مینگل 3 جولائی نا پرامن سرسہب پہیہ جام ہڑتال آ بلوچستان ناالس‘ خاص وڑ اٹ ٹرانسپورٹر آتا تنظیم تتون اوار ایلوفتا منت ءِ ہرفسا پارینے کہ اوفک بلوچستان نیشنل پارٹی نا پرامن پہیہ جام ہڑتال ءِ سرسہب کننگ کن تینا مثبت کڑدار ءِ ادا کریر‘ ہڑتال اٹ بلوچ پشتون علاقہ غاتے ٹی قومی شاہراہ تے بند کرسا الس ہرا یکجہتی نا درشانی ءِ کرینے او ستا کڑزک۔ مچ آ بلوچستان اٹ بلوچستان نیشنل پارٹی نا بنجائی خواست آ بلوچستان نا خراب حالیت‘ بگڑینگوک امن وایمنی نا حالیت‘ وڈھ اٹ سلہہ بند ٹولی تا بھتہ خوری‘ ڈیتھ سکواڈ ناسرجز آتا ودکی‘ خلیس وبھیم تالان کننگ‘ حقی وطن دوست سیاسی جماعت بی این پی نا جہد ءِ نزور کننگ‘ بلوچستان نا قومی راہشون سردار اختر جان مینگل نا برخلاف برجا سازش‘ بلوچستان اٹ زور اٹ گم کننگ نا واقعہ غاتا ودنگ تون اوار ایلو الس دشمن کاریم تابرخلاف 3 جولائی آ مچ آ بلوچستان اٹ قومی شاہراہ تیا پورو پہیہ جام ہڑتال کننگا‘ ہڑتال سہب انا 6بجہ غان ہلیس پیشیم نا 3بجہ اسکان برجا سلیس۔ یات سلے کہ ہڑرتال سہب انا 6بجہ غان بیگہ نا 5 بجہ اسکان ئس ولے پارٹی سرکڑدہ غاک بلوچستان نا الس‘ نیاڑی‘ کودک آ چناتا مشکل آتے مون آتخسا 3بجہ غا ہڑتال ءِ چٹفیر‘ انتئے کہ پارٹی ءِ غیریب الس نا ویل آتاسماءِ۔ نن الس ءِ باور کرفنگ خوانہ کہ الس نا مشکل آک ہمو واکدار آتاا سوب آن ءُ ہرافک دا جاگہ نا الس آن زند انا حق ءِ پلانو‘ الس نا مشکل و ویل آتا سوب آن ہڑتال ناخواست کننگاسس۔ کوئٹہ نوشکے وڈھ خضدار خاران تفتان چاغی دالبندین گوادر پسنی وندر حب لسبیلہ سوراب قلات منگچر مستونگ سبی کوہلو بارکھان ہرنائی نصیر آباد جعفر آباد بسیمہ تون اوار کیہی ہند آتیا قومی شاہراہ تے بند کننگاسس۔

(آن لائن)