ویسٹ انڈیز نا لیجنڈ سر ایورٹن ویکس 95 سال نا وہی اٹ تپاخت کرے

 بارباڈوس (مانیٹرنگ ڈیسک) ویسٹ انڈیز نا لیجنڈری گوازی گر سر ایورٹن ویکس 95 سال نا وہی اٹ کزیت کرے۔ سر ایورٹن ویکس 48 ٹیسٹ میچ آتیٹی 58.61 نا اوسط اٹ 4 ہزار 455 رنز جوڑ کرے۔ سر ایورٹن ویکس پدریسہ پنچ ٹیسٹ ڈائی ٹی سنچری جوڑ کروک آ اسٹ انگا گوازی گر ءِ۔ سر ایورٹن ویکس ءِ ویسٹ انڈیز نا سنگت گوازی گر سر کلائڈ والکوٹ و سر فرینک وورل تون تھری ڈبلیوآن اسٹ نا وڑاٹ اودے درست کننگاکہ۔ کرکٹ ویسٹ انڈیز پارینے کہ نن اسہ پنی ءُُ لیجنڈ و آئیکن اسے آن زہمی مسنو۔ کرکٹ ویسٹ انڈیز پارینے کہ سر ایورٹن ویکس ننا ہیرو ئس ہرادے نن اسُل اُست آن دپنہ۔ سر ایورٹن ویکس نا خاہوت نا سوگ اٹ اونا سنگت و مچ آ دنیا نا اونا کل شیدائیک اوار ءُُ۔ وخت اس کہ اوفک اونا خاہوت تون اُست خواہی نا درشانی ءِ کننگ اٹی ءُُ۔ سر ایورٹن ویکس، سر کلائڈ والکوٹ و سر فرینک وورل 1950ء ٹی انگلینڈ نا ڈغار آ ٹیسٹ کٹوک آ اولیکو ویسٹ انڈیز ٹیم نا بشخ اس ئس۔ سر ایورٹن ویکس سویلی افریقہ نا جان واٹکنز و انگلینڈ نا ڈان سمتھ آن پد نرینہ غاتا ٹیسٹ کرکٹر آتا مسٹمیکو کل آن زیات پیر انگا بندغ ئس، اونا کزیت نا وخت آ اونا وہی 97 ئس۔ 1948ء ٹی انگلینڈ نا برخلاف ٹیسٹ ڈیبیو کروک آ باربیڈین 1958ء ٹی ریٹائر مس و 1995ء ٹی نائٹ ہڈ دوئی کرے۔ جون 2019ء ٹی سر ایورٹن ویکس ءِ اُست انا دورہ مننگ آن پد ہسپتال اٹ بھاز خیالداری ٹی تخاسر۔