ملک اٹ سرمایہ کاری نا گچینی کن گام گیج کننگک‘ اسحاق ڈار

اسلام آباد :  بنجائی وزیر زرگزران سینیٹر اسحاق ڈار پارینے کہ پاکستان اسٹاک ایکسچینج نا انڈیکس اٹ کمتی اُست ہسونی اسے۔ ملک اٹ سرمایہ کاری نا اُست بڈی کن جوان گام گیج کننگک۔ پاکستان سٹاک ایکسچینج اسہ وارولدا ڈیہہ انا جوان کارکڑد والا اسٹاک مارکیٹ اٹ اوار مریک۔ حوال نا رداٹ وزیر خزانہ تون پاکستان سٹاک ایکسچینج و میوچل فنڈز ایسو سی ایشن نا اوار انگا ڈل ایف بی آر ہیڈکوارٹر اٹ اوڑدہی کرینے۔ اوڑدہی ٹی وزیر مملکت برائے زرگزران ڈاکٹر عائشہ غوث پاشا و گورنر سٹیٹ بینک آف پاکستان جمیل احمد، وزیر اعظم نا خاص انگا کمکار برائے زرگزران طارق باجوہ، معاون خصوصی برائے ریونیو طارق محمود پاشا، آر آر ایم سی نا چیئرمین اشفاق تولہ و چیئر مین ایف بی آر عاصم احمد ہم ساڑی ئس۔ میوچل فنڈ ایسو سی ایشن نا ڈل شریعت تون گنڈوک میوچل فنڈ آتا گروتھ آ روشنائی شاغا و سلاہ تس کہ شریعت تون گنڈوک شارٹ ٹرم سکوک اٹ پاش کننگے۔ پاکستان سٹاک ایکسچینج نا پاننگ ئس کہ اسٹاک مارکیٹ نا قومی زرگزران اٹ بھلو بشخ اسے۔

(آن لائن)