پاکستان تون اوار مچ آ دنیا ٹی یوم یکجہتی کشمیر یک شنبے آ اڈتننگک

اسلام آباد : پاکستان تون اوار مچ آ دنیا ٹی یوم یکجہتی کشمیر ءِ پگہ (یک شنبے) آ اسہ وار ولدا پبی وڑاٹ اڈتننگک، ہرسال آنبار داسال ہم پاکستانی قوم یوم یکجہتی کشمیر نا وخت آ حق خودارادیت نا دوئی کننگ کن جہد کروک کشمیری تا جہد اٹی اوفتتون بدل مفروک یکجہتی نا درشانی ءِ کیک۔ یوم یکجہتی کشمیر نا دے آ پاکستان و آزاد کشمیر اٹی ریلی مریک و جلسہ جلوس آتا بست وبند کننگے۔ پیشن نا ملک رہینگوک آ پاکستانیک ہم داوخت آ چندی دود آتیٹی بشخ ہلیرہ وخت اس کہ پاکستانی سفارت خانہ غاتا کنڈآن ہم دے انا رداٹ دود اڈہلیک۔ پاکستان و آزاد کشمیر آن بیدس مچ آ دنیا ٹی رہینگوک آ پاکستانی و کشمیریک دادے ءِ روایتی جوش و جوزہ اٹ اڈایترہ۔ پاکستان نا دا موقف ءِ کہ کشمیری الس ءِ اقوام متحدہ نا کنڈآن آجو و بے کنڈہلوک استصواب رائے نا کمک اٹ تینا حق خودارادیت کاریم اٹ اتنگ نا موقع بایدے رسینگے و دا کہ ڈیہہ ٹی پائیدار امن وسلامتی و شونداری نا سیبو جموں وکشمیر ناجھیڑہ ناپرامن ایسری ٹی ءِ۔ پاکستان نا دا پاننگ ءِ کہ جموں وکشمیر نا جھیڑہ نا انصاف اٹ و پرامن ایسری کن تینا کشمیری ایلم و ایڑھ تا ہرممکن مخ تفی ءِ برجاتخک۔ پاکستان کشمیری تا مدام سیاسی، سفارتی و اخلاقی کہول آ مخ تفی ءِ کرینے۔ پاکستان نا دا درسر نا موقف ءِ کہ کشمیری الس نا است خواہی تا رداٹ اقوام متحدہ نا سلامتی کونسل نا قرارداد آتا رداٹ کشمیر نا ویل انا ایسری اس پٹنگے۔ داکان بیدس آزاد جموں وکشمیر یونیورسٹی نا کنڈآن یوم یکجہتی کشمیر ءِ 5 فروری آ پبی وڑاٹ اڈتننگک۔ جامعہ کشمیر شعبہ تعلقات عامہ نا کنڈآن جاری پریس ریلیز نا رداٹ 5 فروری آ یوم یکجہتی کشمیر ءِ پبی وڑاٹ اڈتننگ کن جامعہ کشمیر چہلہ کیمپس اٹی چندی پروگرامک مریرہ ہرافتے ٹی یونیورسٹی فیکلٹی ممبران، سربراہان شعبہ جات، آفیسر و ملازمت و طالب علم آک بشخ ہلیرہ۔ 5 فروری نا شام کشمیری تتون یکجہتی نا درشانی ءِ کننگ کن موم بتی ہم روشنا کننگک۔ رجسٹرار جامعہ کشمیر پروفیسر ڈاکٹر عائشہ سہیل داوخت آ پارے کہ یوم یکجہتی کشمیر اڈتننگ نا مسخت تدوک آ 76 سال آن بھارت نا کوزہ ٹی جموں وکشمیر نا بیوس الس تون ہراڑے پبی یکجہتی نا درشانی ءِ کننگ ءِ ہموڑے کشمیری الس بھارتی فوج انا ظلم و ستم، جور واستبداد، انسانی حق انا بدترین خلاف ورزی، ریاست جموں وکشمیر نا خصوصی حیثیت ءِ چٹفسا مسلم گیشتری ءِ اقلیت اٹ بدل کننگ نا بھارتی گام گیج آتا کنڈا چکار کرفنگ آن بیدس اقوام متحدہ نا سلامتی کونسل نا قرارداد آتا ردات کشمیر نا ویل انا ایسری نا کنڈا جہانی برادری نا چکار ءِ کرفنگ ءِ۔ مقبوضہ جموں کشمیر اٹی پنچ اگست 2019 نا بھارتی حکومت نا اسہ کنڈی و غیرکانودی گام گیج آن پد پاکستان و آزاد جموں وکشمیر نا کنڈآن مقبوضہ جموں وکشمیر اٹی آجوئی و حق خودارادیت نا جہد کروک آ ایلم و ایڑھ تتون یکجہتی نا درشانی نا اہمیت مہالو آن بھاز زیات ودانے۔

(اے پی پی)